Polísia Nasionál Timor-Leste (PNTL) detein estudante Universidade da Paz (UNPAZ) na’in 16 iha sela detensaun, durante oras 72, hodi submete ba prosesu investigasaun hafoin lori ba Tribunal Distrital Díli atu partisipa iha primeiru interogatóriu.
Komandante PNTL munisípiu Díli, Superintendente Xefe Armando Monteiro, hatete, kazu omisídiu ne’e akontese iha resintu Universidade da Paz, iha Segunda (22/06/20) mais ou menus tuku 2 madrugada, oras Timor-Leste.
Alende ne’e, iha akontesimentu ne’e, rezulta estudante na’in 6 kanek no Polísia transporta kedas vítima sira ba hala’o tratamentu iha Ospitál Nasionál Guido Valadares.
Komandante PNTL munisípiu Díli, Superintendente Xefe Armando Monteiro seidauk esplika kronolojia loloos husi akontesimentu, tanba kazu ne’e sei iha hela prosesu investigasaun.
“Mate-isin iha ona mortuáriu Ospitál Nasionál Guido Valadares, enkuantu PNTL detein estudante na’in 16, hodi submete ba prosesu investigasaun”, esplika Komandante PNTL munisípiu Díli, Superintendente Xefe Armando Monteiro, ba jornalista sira, Segunda (22/06/20), iha Kuartel PNTL Díli.
Alende ne’e Domingos Maia, núdar matebian nia aman, liu husi konferénsia imprensa deklara estudante sira mak halo planu hakotu nia oan nia vida. Tanba ne’e nia hakarak prosesu ba kazu tenki la’o ba oin.
“Ita hotu-hotu moris iha lei nia okos, lei mak determina ida ne’ebé mak sala no loos, ne’e investigasaun mak sei determina”, dehan Domingos.
Mate-isin submete ona ba prosesu outopsia no entrega ona ba família iha aldeia Efaca no tuir planu família sira sei hader kalan ida iha nia rezidénsia iha Díli, hafoin sei transporta ba uma-lisan iha munisipiu Ermera, hodi hala’o seremonia funebre. avi
