Komandante Jeral PNTL, Komisario Faustino da Costa, atualiza ezistensia partidu foun balun ba Prezidente Repúblika (PR), Francisco Guterres Lú Olo, iha ne’ebé partidu sira ne’e nia naran temi iha konotasaun ladiak ba kultura tradisaun Timor-Leste.
“Ami informa ba PR kona-ba situasaun foun ne’ebé ita hotu akompaña hanesan iha partidu foun barak no iha partidu balun ne’ebé nia naran ita temi nia konotasaun ladiak ba kultura tradisaun Timor nian”,dehan Komisáriu Faustino da Costa, ba Jornalista sira Kinta (18/06/2020), hafoin remata enkontru semanal ho PR, iha Palásiu Prezidensial Aitarak-Laran, Díli.
Komandante Jeral PNTL ne’e haktuir, nia informa konaba ezistensia partidu foun sira ne’e ba PR, hanesan ho partidu sira seluk iha rai ida ne’e hodi konkore iha eleisaun parlamentar tinan 2023 oin mai.
Partidu foun sira ne’ebé sai trend iha públiku no halo ema hotu hakfodak liu-liu nia naran ne’e mak hanesan Partidu Unidade Timoroan Aaswain (PUTA).
Alende ne’e, Komisáriu PNTL Faustino da Costa, atualiza kazu asidente no insidente ba PR ne’ebé mak rejista iha PNTL ho total kazu asidente 4 ida mate no 3 kanek todan no kazu insidente hamutuk 27.
“Maioria hosi akontesimentu sira ne’e, neglijensia humana ka fator ema ingora regra no konduz transporte tuir hakarak no kazu insendente hamutuk 27 kompostu hosi kazu tara-an assosidos, ne’ebé akontese iha Baukau Laga inklui kazu úniku ida akontese iha Munisipiu Ermera, iha ne’ebé bebe moris mai ho ulun rua”,afirma Komandante Jeral PNTL .
Faustino hatutan, situasaun seluk mak entrada ílegal ne’ebé forsa seguransa fronteira kaptura iha loron hirak liu ba, liu-liu hanesan kaptura sira ne’ebé tama ílegal.
“Ida ne’e la’os sidadaun Timor, ami koordena atu deporta no sira ne’ebé Timor-oan kumpri regra Estadu Emerjénsia hosi Ministériu Saúde. Ami mós atualiza kazu ró tama iha Jaco Lospalos ba PR, tanba prosesu investigasaun oras ne’e la’o hela no ema hirak ne’ebé kaptura oras ne’e kumpri hela iha kuarantena,”dehan nia.Fel
