Laiha nesesidade prolonga Estadu Emerjénsia (EE), tanba ne’e mandatu Sentru Integradu Jestaun Krize (SIJK), sei remata bainhira laiha tan EE, maibé Governu kontinua hola medidas hodi prevene COVID-19, tama mai teritoriu nasionál.
“Aban (ohin-red), oras tuku 00:00 kalan situasaun Estadu Emerjénsia (EE), ne’ebé prolonga ba faze da tolu ne’e remata, tamba ne’e husi sala situasaun enkontru ho komisaun interministerial, hodi hato’o relatoriu aktividade, ne’ebé mak sala situasaun hala’o hahu husi estensaun EE iha primeiru to’o segundu faze, kona-ba prominores ba relatoriu ne’e, Governu mak sei fó sai”, dehan, Komandante Operasionál SIJK, Brigadeiru Jeneral João Miranda "Aluc Descartes", iha Palásiu Governu, Kinta (25/06/2020).
Brigadeiru Aluc hatutan, atu prevene nafatin situasaun COVID-19, ne’e responsabilidade tomak entrega ba Ministériu Saúde (MS), maibé, ne’e sei hein rezultadu husi Governu.
“Tuir enkontru husi komisaun interministeriál laiha nesesidade atu estende ba EE, maibé ida ne’e la signifika ita la hola medidas oinsa mak, atu prevene nafatin situasaun COVID-19, responsabilidade ida ne’e sei pasa ba MS, maibé ne’e Governu mak sei fó sai”, afirma, Brigadeiru Aluc.
Brigadeiru Aluc hatutan, tuir medidas protokulares sei obedese nafatin, katak ema sira ne’ebé tama mai husi fronteira tenke ba halo kuarentena.
“MS iha konstituisaun define kompetensia balun ba área saude nian, tamba ne’e, sira bele hola medidas balun ne’ebé iha relasaun ho saúde públika, mandatu SIJK nian remata bainhira laiha tan EE”, tenik, Komandante Operasionál SIJK ne'e. Cin
