Xefe Estadu Maior Jeneral FALINTIL - Forsa Defeza Timor Leste (F-FDTL), Maijor Jeneral Lere Anan Timur, hatete, nia mandatu atu remata Prezidente Repúblika(PR) ho Governu mak hatene.
Tanba tuir, Xefe Estadu Maior Jeneral F-FDTL, Maijor Jeneral Lere Anan Timur, nia mandatu atu remata ne’e, iha Governu no Prezidente Repúblika nia liman, tanba ne’e la’os kargu polítika, maibé, ne’e kargu tuir kareira ne’ebé mak iha.
“Ha’u nia mandatu ne’e Prezidente mak hatene, Governu mak hatene aban remata ka bainrua remata ka, ida ne’e la’os kargu polítiku ida ne’ebé tenke hili fali ema ida mai tur iha ne’eba laiha, ne’eba ne’e tuir karreira no kalanerizasaun sé mak ba ne’e mak importante hela ka sai ne’e ba ha’u la’os importante, importante estabilidade nasionál ida ne’e mak importante liu”, dehan, Xefe Estadu Maior F-FDTL, Maijor Jeneral Lere Anan Timur, iha Palásiu Prezidensial, Bairro-Pite, Kuarta (17/06/2020).
Líder Máximu F-FDTL ne’e afirma, atu instituisaun F-FDTL ne’e kredivel presija hili ema ne’ebé mak, iha kapasidade no kompetente hodi halo serbisu, maibé labele koloka ema arbiru.
Lere Anan Timur haktuir, maske ema hotu nota katak, líder F-FDTL ne’e hanesan membru Komite Sentral FRETILIN, maibé bainhira sai husi F-FDTL, sei la ba Komite Sentral FRETILIN, maibé sei sai neutru, hodi dezenvolve Timor-Leste no oinsa povu nia moris di’ak ba futuru.
Lere deklara, nia la’os fundador FRETILIN no la’os fundador FALINTIL, maibé hanesan fundador ba nasaun Timor-Leste, tanba ne’e iha dever no obrigasaun atu kontribui ba rai ne’e.Ina
