Sidadaun Xinéz na’in rua ho inisiál HQ ho ZJ tenta halo agresaun fíziku hasoru Komandante Polísia Nasionál Timor-Leste (PNTL) munisípiu Díli Superintendente Xefe Armando Monteiro.
Kazu ne’e akontese iha Segunda (22/06/20), mais ou menus tuku rua madrugada iha área Fatuhada Díli munisípiu Díli, wainhira Komandante ne’e atu desloka ba haree kazu omisídiu ne’ebé mak akontese iha Universidade da Paz, rejulta joven ida mate, hafoin monu husi uma andar leten tuun mai rai.
Komandante Armando Monteiro esplika, kazu ne’e akontese, wainhira sidadaun Xineza inisiál HQ ho ZJ, hala’o viajen iha tempu kalan ho kareta Prado mutin ida, kareta nia sapa matrikula HHH 9999 Timor-Leste.
Sidadaun na’in rua kondisaun lanu hotu, hafoin halai kareta ho velosidade maka’as, iha área Fatuhada, tenta atu soke Komandante ne’e, wainhira Komandante ne’e hapara kareta ne’ebé mak kondus husi sidadaun Xineza na’in rua ne’e.
Sidadaun Xinéz na’in rua tuun husi kareta hakat ba komandante nia kareta hodi baku kareta nia odamatan, wainhira komandante ne’e hatun vidru, Xinéz na’in rua ne’e haree, hakfodak, tanba Polísia, ho aktu ne’e suspeitu na’in rua ne’e tenta halai, maibé konsege kaptura no detein iha sela detensaun munisípiu Díli.
Komandante ne’e dehan, sidadaun na’in rua ne’e komete kazu tentativa agrsaun fiziku no kontra kodigu estrada, Tanba lanu hodi kondus kareta Ho nune’e, suspeitu na’in rua tenki detein iha sela detensaun munisípiu Díli hodi submete ba prosesu investigasaun hafoin aprejenta ba Tribunal.
“Ita nia lei kodigu estrada hateten kuandu ho kondisaun lanu konsidera krime, pior liu tan kontra autóridade Polísia, bainhira hala’o nia kna’ar, terseiru viola mós kodigu”, esplika Komandante PNTL munisípiu Díli, Superintendente Xefe Armando Monteiro ba jornalista sira, Segunda (22/06/20) iha Kuartel PNTL Díli.
entretantu kareta ne’ebé mak suspeitu sira utiliza asegura ona iha Kuartel PNTL, Caicoli-Díli. avi
