Porta-Voz PNTL Superintendente Xefe, Armando Monteiro, hateten, kazu deskonfia Violasaun Seksuál (VS) envolve sidadaun Australianu ida ho inisiál RFT hasoru menoridade no tráfiku umanu, sei iha tan suspeitu no vítima sira seluk.
“Husi kazu primeiru abuzu seksuál ba menoridade, Komando Jerál PNTL liu husi Servisu Investigasaun Kriminal Nasionál halo kooperasaun no servisu hamutuk ho Polísia Federal Austrália mak família vítima halo denunsia iha Austrália no hafoin liu husi koordenasaun kooperasaun ida ne’e mak ita identifika no lokaliza suspeitu hodi halo partisipasaun hafoin loron rua liu ba ita implementa desizaun tribunál. Husi desizaun ida ne’e mak agora dadauk suspeitu RFT, sidadaun estranjeiru no investigasaun ida ne’e mós kontinua la’o hela. Agora dadauk ita-nia servisu investigasaun servisu hamutuk ho ekipa téknika Forensik Austrália Federal Políce hodi rekolla tan evidénsia balun. Husi investigasaun ida ne’e, ita sei dezenvolve deskonfia sei iha tan suspeitu no vítima sira seluk”, esplika Porta-Voz PNTL Superintendente Xefe Armando Monteiro, ba jornalista sira, Sesta (17/06/2022), iha Kuartél Jerál PNTL, Kaikoli, liu husi konferénsia ba imprensa.
PNSIK kaptura sidadaun Austrálianu ho inisiál RFT iha Kinta (16/06/2022), iha rezidénsia ida iha área Markoni, Suku Fatuhada, Postu Administrátivu Dom Aleixo, Munisípiu Díli, deskonfia envolve iha kazu violasaun seksuál hasoru menoridade Timor-oan no tráfiku umanu.
Dadauk ne’e suspeitu halo detensaun hela iha sela Polísia Kaikoli durante oras hitu nulu resin rua, molok aprezenta ba Tribunal tuir primeiru interogatóriu.avi
