Polísia Nasionál Timor-Leste (PNTL) Munisípiu Díli, liu husi Eskuadra Polísia Verra-Cruz, detein suspeitu ida ho inisiál JV, ne’ebé deskonfia envolve iha kazu tentativa omisídiu hasoru vítima Marçelino Mesquita.
Kazu tentativa omisídiu ne’e akontese iha área Manumeta-Raihun, Suku Villa-Verde, Postu Administrativu Verra-Cruz, Munisípiu Díli, Domingu (12/06/2022), mais ou menus tuku hitu kalan.
Tuir kronolojia husi vítima Marçelino Mesquita katak, nia hetan ta’a hafoin fila husi toos bainhira tama uma-laran hasoru kedas suspeitu kaer katana foti sa’e katana atu ta’a hasoru vítima, maibé sorte di’ak vítima nia fen konsege salva nia kaben.
“Ha’u mós la hatene motivu husi akontesimentu ida ne’e, suspeitu ne’e mai derepente de’it iha uma. Bainhira ha’u fila husi tos mai ha’u lori ai hatun tiha hotu, ema sira hemu hela tua iha tos tuun mai ida ho inisiál JV ne’e mai uma kaer kedas ho katana ida ne’ebé kro’at atu ta’a ha’u sorte ferik oan mak salva tiha se la’e karik ha’u kous hela labarik ha’u kal kotu. Ne’e mak ha’u hakarak prosesu kazu ne’e ba oin”,esplika vítima Marçelino Mesquita, ba JNDiário, Segunda (13/06/2022), iha Kuartel Polísia Munisípiu Díli.
Kazu ne’e rejista ho númeru krime 0101/122.didil. Tuir lei númeru 5/2017 arma brankas, bandu ema kaer sasán kro’at hodi hakanek no habadak ema seluk nia vida.avi
