Polísia Nasionál Timor-Leste (PNTL) Munisípiu Ermera detein suspeitu na’in neen, ne’ebé halo asaltu ba kareta ida, hodi baku mate hotu manu- broiler iha área Mota-Hare Railaku.
Komunidade sira halo asaltu ba kareta ne’e, tamba la satisfeitu ho hahalok Manajer Manu Luhan Railaku, ne’ebé rejeita fa’an manu ba komunidade Mota-Hare Railaku atu sosa, maibé nia deside fa’an fali ba munisípiu seluk.
Komandante PNTL Munisípiu Ermera, Superintendente Ludgério Lay, via telefónika informa, kazu ne’e akontese iha Segunda (13/06/2022) mais ou menus tuku lima lorokraik no polísia halo kedas atuasaun hodi kaptura suspeitu na’in neen.
“Kazu ne’e tuir orientasaun Prokurador konsidera danu simples. Tamba ne’e kareta ita fó fila ba na’in hodi halo aktividade, tula manu sira ne’e fila ba manu luhan iha Railaku. Ne’ebé suspeitu iha na’in neen”,dehan Superintendente Lodgério Lai, Tersa (14/06/2022).
Kona-bá kuantidade manu ne’ebé mate, polísia la fó esplikasaun, tanba sei iha prosesu investigasaun. avi
