Polísia Nasionál Servisu Investigasaun Kriminál (PNSIK) detein sidadaun Austrálianu mane ida ho inisiál RFT, ne’ebé deskonfia envolve iha kazu tráfiku umanu no violasaun seksuál (VS) hasoru menoridade.
Iha Kinta (16/06/2022) mais ou menus tuku 7 dader-san Oras Timor-Leste, Polísia Nasionál Servisu Investigasaun Kriminál, ezekuta mandadu husi Tribunal Distritál Díli, hodi halo detensaun no aprénsaun, hasoru sidadaun Australianu ida ho inisiál RFT, iha área Markoni, Suku Fatuhada, Postu Administrátivu Dom Aleixo, Munisípiu Díli.
Tuir informasaun husi Polísia, PNSIK halo detensaun ba sidadaun Austrálianu refere, bazeia ba keixa husi vítima balun nia família, tanba deskonfia envolve iha kazu tráfiku umanu no violasaun seksuál hasoru sidadaun Timor-oan balun ne’ebé menoridade.
PNSIK rekolla kolsa, ne’ebé nahe iha kama-laran, ne’ebé sidadaun Australianu ne’e uza hodi toba.
PNSIK mós rekolla pasaporte no telemovel, motorizada Vario mutin ida, husi sidadaun RFT núdar evidénsia.
Iha prosesu buska ne’e, PNSIK akompañadu husi parseiru Polísia Nasionál Timor-Leste, Timor Leste Police Development Program (TLPDP) Austrália.
PNSIK transporta sidadaun ne’e ba Kuartel Jerál PNTL Kaikoli, hodi hala’o detensaun durante oras 72, molok aprezente ba tribunal, hodi tuir primeiru interogatóriu. Kazu ne’e rejista ho númeru krime 0113/22.PNSIK.avi
