Polísia Nasionál Servisu Investigasaun Kriminál (PNSIK) detein sidadaun ida ho inisiál IXL, deskonfia envolve iha kazu extorsaun seksuál online, ne’ebé mak durante ne’e viral iha rede sosiál.
Sidadaun IXL kaptura besik resintu Kuartel Jerál PNTL Kaikoli, Díli, Kinta (16/06/2022), hafoin vítima ba hato’o keixa iha PNSIK. Dadaun ne’e, sidadaun refere detein iha sela Polísia, iha Kaikoli durante oras hitu nulu resin rua, molok aprezenta ba primeiru interogatóriu iha Tribunal Distritál Díli.
“Kazu ne’ebé tuir termu kriminolojia bain-bain ema dehan grooming ne’ebé mak durante ida ne’e viral liu iha media sosiál. Maneira suspeitu ou autór sira tenta uza liu husi média ida oinsá atu bele halo relasaun espesífiku kolega liu husi média sosiál hafoin ida ne’e autór sira ne’e hakbesik a’an konvense oinsá atu hetan dokumentasaun husi vítima no husi dokumentasaun. Bainhira ita hetan depois suspeitu tenta ezije ou husu vítima hodi bele fó materiál tantu mós sasán sira seluk hodi atinji ba nia objetivu ne’ebé mak nia lansa hela iha media sosiál. Durante ne’e ita akompaña de’it iha media sosiál, maibé prátika ida ne’e mós la’o tiha ona hafoin vítima balun hato’o nia situasaun ida ne’e mai iha Servisu Investigasaun Kriminál, depois hamutuk ho vítima, Servisu Investigasaun Kriminál identifika no lokaliza suspeitu, ita kaptura kedas iha área besik iha komandu jerál, mais ou menus 100 metrus no agora dadauk submete hela ba prosesu investigasaun. Tamba ne’e, liu husi oportunidade ida ne’e apela mós ba komunidade, liu-liu utulizasaun média sosiál tanba balun utiliza sala no oinsá atu bele desakridita ita-nia dignidade núdar sidadaun, núdar Timor-oan. Tantu mós núdar umanu hodi nune’e sira bele hetan lukru husi atividade ne’ebé mak sira halo”, esplika Porta-Voz PNTL Superintendente Xefe Armando Monteiro, ba jornalista sira Sesta (17/06/2022), iha Kuartel Jerál PNTL kaikoli, liu husi konferénsia ba imprensa. Kazu refere rejista ho númeru krime 0119/2022 PNSIK.avi
