Polísia Nasionál Timor-Leste (PNTL), Munisípiu Díli, buka tuir hela individu balun ne’ebé fa’an kartaun access pass hodi autoriza tama asiste Troféu Kopa Mundiál iha Estádiu Munisipál Díli, tanba kartaun access pass ne’e fahe ba ema ho gratuita la’ós atu fa’an fali.
Iha Sábadu (11/06/2022), Troféu Kopa Mundiál vizita Díli, Timor-Leste, durante oras neen.
Bainhira Troféu Kopa Mundiál ne’e to’o iha Díli, Polísia Nasionál Timor-Leste, fó seguransa, hahú husi Aeroportu Internasionál Nicolau Lobato ba to’o Estádiu Munisipál Díli .
Maibé durante vizita Troféu Kopa Mundiál ne’e, PNTL Munisípiu Díli hetan informasaun husi fontes balun katak, iha individu balun fa’an kartaun akses paz ba sidadaun, hodi tama ba Estádiu Munisipál Díli atu asiste Troféu Kopa Mundiál ne’e.
Komandante PNTL Munisípiu Díli, Superintendente Xefe, Henrique da Costa, hateten, kartaun access pass ne’ebé distribui husi komisaun organizadora ba komunidade gratuita.
Ho aktu refere, PNTL husu ba sidadaun ne’ebé sosa kartaun access pass atu informa ba Polísia, nune’e Polísia bele halo atuasaun, no submete ba prosesu investigasaun.
“Ita Komandu Díli ita mós hetan informasaun katak iha individu balun fan fila-fali akses paz ba iha ita nia sidadaun balun ita hato’o ona informasaun para ita nia komunidade karik mak sosa karik sira tenki hato’o keisa ba iha Polísia ita prosesu tamba tuir koordenasaun seguransa ho parte Sekretária Estadu Juventude Desportu nomos parte Federasaun Futebool Timor-Leste katak akses paz ne’ebé mak distribui ba ita nia komunidade ne’e labele atu fan ne’e fó gartuitumente ba iha ita nia komunidade. Ne’ebé balun sosa fila-fali husu para mai hato’o keisa ba iha Polísia para nune’e ita bele loke prosesu”, esplika Komandante PNTL Munisípiu Díli Superintendente Xefe Henrique da Costa, ba jornalista sira Segunda (13/06/2022), iha Kuartel Polísia Kaikoli Díli.
Durante vizita troféu kopa mundiál iha Díli, hetan seguransa husi membru PNTL hamutuk 9,80, kompostu husi Komandu PNTL Munisípiu Díli, membru Unidade Espesiál Polísia (UEP) Unidade Patrulhamentu Fronteira (UPF) no Kontijente Jerál Komando PNTL.avi
