Porta-Voz PNTL Superintendente Xefe, Armando Monteiro, informa, Prosesu investigasaun ba kazu importa kareta sukata no importasaun ai-moruk, husi Farmásia Moris Foun, finaliza ona.
Porta-Voz PNTL Superintendente Xefe, Armando Monteiro, iha salaun enkontru Komandu Jerál PNTL, Kaikoli, semana kotuk, informa, rezultadu prosesu investigasaun ba kazu importasaun kareta sukata no importasaun Ai-moruk liu husi Portu Díli ba armajén Servisu Autónomu Medikamentu no Ekipamentu Saúde (SAMES) Polísia Nasionál Servisu investigasaun finaliza ona no submete ona ba Ministériu Públiku.
“Kazu Portu Díli, iha kazu rua. Kazu ai-moruk, tantu mós kazu karreta sukata nian. Kazu rua ne’e, PNTL finaliza ona investigasaun no aprezenta ona bá Ministériu Públiku,”dehan Porta-Voz PNTL Superintendente Xefe Armando Monteiro.
Kareta sukata 131 ne’ebé importa husi Austrália, polísia priende hela iha Portu Díli.
Tuir dekretu lei númeru 30/2022/ loron 20, fulan-Juñu kareta ne’ebé importa husi nasaun seluk tenke tenke seguru bá ema nia vida.
Maibé tuir observasaun jornalista iha terrenu, kareta 131 ne’ebé importa husi Austrália ne’e kondisaun ladi’ak no bele fó ameasa ba ema nia vida.
Kona-bá kazu importasaun ai-moruk husi Farmásia ka Klínika Moris Foun, iha Segunda (13/06/2022), SIKN deteta kompañia importadór ne’ebé durante ne’e importa ai-moruk mai SAMES la tuir kontratu ka akordu ne’ebé halo ho Governu, liuhosi Ministériu Saúde.
Tuir kontratu ne’ebé kompañia Farmasia ka Klínika Moris Foun halo ho Governu liu husi Ministériu Saúde, iha item ai-moruk hamutuk lima hanesan aimoruk Amoxillin and Clavulanate, Potasium Azithromicin, Mefenamic Acid & Dicyclomic Hydrochloride no Paracetamol, maibé aimoruk ne’ebé kompañia importa ba SAMES inklui mós aimoruk seluk tan.
Bazeia bá faktu sira ne’e, PNSIK halo identifikasaun hodi submete ba prosesu investigasaun.avi
