GMN TV Justica e Segurança Sidadaun sira kritika servisu Notariadu, MJ Tiago “taka ibun” ba média

Sidadaun sira kritika servisu Notariadu, MJ Tiago “taka ibun” ba média

375 views

Sidadaun sira ne’ebé trata dokumentu Billete Identidade, Sertidaun RDTL no Passaporte, kritika Governu liu-hosi Diresaun Jeral Servisu Rejistu Notariadu Ministériu Justisa (MJ), atu hadi’ak sistema atendimentu ne’ebé la’o lentu, basá fatin sira hanesan ne’e hatama reseitas ba Estadu,, presiza tratamentu estraordinária.

“Ami ne’ebé atu mai trata dokumentu BI no sertidaun RDTL, tenke mai iha Notariadu iha tuku 3 ou 4 madrugada tanba deit hakarak hetan númeru ki’ik, maske atendimentu iha tuku 8  liu,”dehan Mimia da Costa Fernandes, ba JN-Diário, Kuarta (22/06/2022) iha Kaikoli, Díli.

Sidadaun ne’e hatete, atendimentu fúnsionáriu sira ne’ebé atende públiku dalaruma hamosu konfuzaun tanba sira fó loron katak semana mai foti BI ka RDTL, maibé dalaruma to’o tiha fulan ida, ne’e ema barak hirus no la satisfeitu ho hahalok sira hanesan ne’e.

Nune’e mós, Andre Viana Amaral, hatutan, servisu Notariadu presiza halo atendimentu estraordinária, tanba fatin ne’e hatama osan ba Estadu. Tanba ne’e, nia sujere presiza aumenta fúnsionariu hodi halo atendimentu di’ak liu tan tanba ema barak mak mai trata sira-nia dokumentu, maibé fúnsionariu ne’ebé halo atendimentu oituan deit hodi prejudika tebes.

“Kada loron ema mai bou malu iha ne’e hodi trata dokumentu, maibé kondisaun fatin ba atendimentu kloot hodi ema tenke forma naruk no hadau malu, entaun hakarak ka lakohi ami ne’ebé mai tratamentu BI ho RDTL tenke mai sedu iha madrugada, maibé tempu atu trata fali dokumentu han tempu to’o fulan no ida la hatene tanba saida”.preokupa.

Iha parte seluk, Deputada Bankada Frente Mudansa, Isabel Ximenes, salienta atendimentu funsionáriu Notariadu ba  públiku la klareza liu-liu iha informasaun, tanba iha sidadaun balun ne’ebé trata pasaporte ho emerjénsia no tempu atu foti labele tanba dehan mákina avaria nune’e adia prosesu atendimentu.

“Husu ba Ministériu relevante atu haree di’ak kestaun ne’e hodi la akontese ba Sidadaun sira ne’ebé ho urjénsia presiza pasaporte”.dehan.

Hatán ba kestaun ne’e, Diretór Nasionál Identifikasaun Sivíl no Rejistu Kriminál, Vítor da Costa Neto, esplika, atu hadi’ak sistema atendimentu ne’ebé di’ak no lais presiza apoiu orsamentu no polítiku.

“Deskontentamentu ema nian atu koalia, maibé atendimentu iha Notariadu laiha diskriminasaun. Tanba ne’e, atendimentu públiku no difísil atu haree deit ba família tanba Sidadaun ne’ebé trata dokumentu la’ós 10 ou 20 deit maibé 100”.haktuir.

Nune’e mos, Diretór Nasionál Identifikasaun Sivíl no Rejistu Kriminál, Vitór da Costa, hatete liu ona semana rua, atendimetu funsionáriu sira, iha Diresaun Nasional rejistu no Notariadu, ba sidadaun sira ne’ebé mak trata dokumentu Billete Identidade (BI) no Pasaporte, la’o ladun di’ak.

Tambá sistema sira hanesan UPS, Server, makina no jeradór sira, ne’ebé mak sira utiliza hodi bele imprimi sai, dokumentu hirak ne’e la funsiona ho di’ak ka avaria, nune’e atendimentu ba públiku la’o la normal hanesan baibain.

“Atendimentu durante ne’e la’o di’ak hotu, laiha problema, so que iha semana rua liu ba iha ita-nia server ne’a mak ninia dadus ne’e nakonu entaun ami presiza tempu kuaze semana ida, atu bele back up hasai tiha dadus balu, halo mamuk fali, para halo fali atendimentu porque   kuandu dadus ne’e mak nakonu demais iha server laran mak nia lakohi simu ona aplicante foun ne’ebé mak ita hatama nia identidade ba iha sistema, tambá ne’e mak ami hapara atendimentu ida ne’e. ita presiza fali kooperasaun ida entre tékniku IT husi Diresaun Nasional Identifikasaun Sivíl ninian no mós ho komapañia parseiru sira ne’ebé mak fó apoiu tékniku ba ita, ami presiza semana ida resin hodi rekupera fali ita-nia atividade atendimentu passaporte no BI”,hateten Vitór da Costa, iha Diresaun Nasional rejistu Notariadu, Kolmera, Díli.

Vitór esplika, sistema hirak ne’ebé avaria iha Diresaun Notariadu Nasionál,  hato’o ona ba Ministru Justisa (MJ), Tiago Amarál Sarmento,  maibé to’o agora Governante ne’e sedauk fó solusaun ba problema ne’e.

“Kuaze problema hotu-hotu ne’ebé mak mosu, ami halo relatóriu ba Ministru, resposta ministru mós sempre lalais, so que prosesu ida be atu responde ba kompra ou ba aprovizionamentu atu bele responde lalais ita-nia necessidade sira ne’e, presiza prosesu ne’e tempu naruk, entaun ida ne’e mak halo atrazu”, Hatutan Vitór da Costa.

MJ Tiago “taka ibun” ba média

Relasiona ho problema ne’e, iha Kuarta feira ne’e, Ministru Justisa (MJ) Tiago Amarál Sarmento, to’o kedas iha fatin hodi halo observasaun ba sistema no atendimentu ba públiku iha Diresaun Nasional Rejistu  Notariadu, Kolmera, Díli.

Maibé hafoin halo observasaun, governante ne’e, lakohi fó komentáriu ba média sira, kona-ba problema sistema produsaun BI no Pasaporte, no problema seluk ne’ebé Diresaun Nasional Rejistu  Notariadu,  ne’e enfrenta, maske jornalista sira tenta hela deit. Fel/Ags


Banner

Foto

Notisia Ikus

PN pede às autoridades sanitárias que inspecionam carne vendida nas bermas das estradas

July 1, 2022
O deputado da bancada da Frente Revolucionário ...

Inflasaun Global halo TL lakon retornu investimentu FP biliaun USD 1.6

July 1, 2022
Ministru Finansan, Rui Agusto Gomes hateten, dur...

Xanana husu nasaun hotu atu proteje Oceano ho baze iha siénsia no inovasaun

June 30, 2022
Líder Nasionál Kay Rala Xanana Gusmão, husu b...

SEFOPE sei hamenus númeru dezempregu iha rai-laran

June 29, 2022
Sekretaria Estadu Formasaun Profísional no Empr...

AJAR apresia TR deside Projetu-Lei Responsabilidade PR inkonstitusionál

June 29, 2022
Diretór ezekutivu Asia Justice And Right (AJAR)...
1 2 3 742

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker