Ministru Negósiu Estranjeiru no Kooperasaun (MNEK), Dionísio Babo, informa, Ministra Negósiu Estranjeiru no Kooperasaun Australia, Julia Bishop, iha Domingu (29/7/18), sei vizita Timor-Leste hodi koalia kona-ba kooperasaun bilateral rai rua ninian.
Durante estadia Julie Bishop nian iha TL sei koalia mos kona-ba asuntu oinsa buka maneira atu aumenta tan númeru traballador Timor oan, atu servisu iha Australia.
“90% ona preparasaun hodi simu MNEK Australia Julie Bishop, vizita durante loron tolu, maibe vizita traballu. Nia vizita formal loron ida ho balun deit, nia sei to’o iha 29 lorokraik sei iha sesaun interna ho nia Emabixada Australia iha Timor Leste, no iha loron 30 mak hala’o vizita traballu, alende ne’e halo mos enkontru bilateral ho ita-nia nai ulun bo’ot nasaun ninian, no iha loron tuir mai nia sei hala’o enkontru informal balun, ne’ebé nia rasik husu atu hala’o ho entidade Timor oan sira,”dehan Dionísio Babo ba Jornalsita sira Sesta (27/07/2018), iha Parlamentu Nasional.
Afirma Dionísio Babo, vizita MNEK Australia nian ne’e mos sei koalia konaba area ne’ebé nasaun rua ne’e hala’o ona atu haforsa liu tan hanesan iha area defeza, edukasaun, no area seluk ne’ebé relevante.
“Area ne’ebé ami hakarak aborda mak konaba maluk Timor oan sira ne’ebé durante ne’e balun ba servisu tiha ona iha Australia, liu husi aranju ida ne’ebé SEPFOPE mak halo, mas nia númeru ne’e sei oituan hela. Tanba ne’e agradese ita-nia maluk sira ba iha ne’eba servisu diak, ho komportamentu diak, tamba ho servisu ne’ebé temporariu, entaun sira fila fali mai, tamba komporta diak, entaun Governu Australia hanoin ona katak atu haree maneira oinsa ita bele aumenta tan númeru traballador ne’e,”dehan Dionísio Babo.
Nia afirma, servisu ida ne’e la’os traballador sira ba hetan osan de’it, maibe ba koñese sidadaun nasaun seluk, no gaña tan koñesimentu, fila mai bele aplika tan iha Timor.
“La’os dehan katak, ita buka buat ne’e atu haruka ema ba rai liur, maibe ita buka para kria kampo traballu, maibe Governu nian kontrola nafatin ámbitu ida hanesan SEPFOPE, tamba ne’e kesatun ne’e ami sei aborda, maibe haree-tok oinsa mak ami bele hetan rezultadu ne’ebé mak pozitivu,”realsa Dionísio Babo.
PNTL la autoriza manifestasaun
Durante vizita Ministra Negósiu Estranjeiru no Kooperasaun Australia, Julie Bishop, iha Díli, Timor-Leste, Polísia Nasional Timor-Leste (PNTL), sei la autoriza maluk Timor oan sira halo manifestaun hasoru.
``Vizita Ministra Australia ne´e sei mai iha Domingu bairua, Komandante PNTL Munisípiu Díli, Pedro Belo, koalia tiha ona katak, laiha karta lisensa ruma atu halo manifestasaun iha Díli laran. Komando Díli prepara ona planu operasaun ne´ebé sei garante seguransa hahú kedas husi Aeroportu Internasional Nicolau Lobato Comoro to´o iha Hotel no vizita iha fatin sira ne´ebé mak teknikalmente koordena ho MNEK, parte seguransa husi Unidade Polísia Espesial no mós seguransa iha rute sira husi membru Tránzitu husi Komando PNTL Munisípiu Díli,``esplika Segundu Komandante PNTL Munisípiu Díli Superintendente Asistente Euclides Belo ba GMN, Sesta (27/07/18), iha Kuartel PNTL, Díli.
Enkuantu kona-ba total membru ne´ebé mak sei koloka, Euclides Belo dehan, la presiza atu esplika ba públiku, maibe klaru katak, komando PNTL Munisípiu Díli sei garante seguransa ne´ebé mak diak durante vizita Ministra Julie Bishop.
Euclides Belo hatutan, bainhira atu halo manifestasaun ténki hatama karta antes loron tolu ba PNTL atu haree hodi bele fó lisensa ka lae? Maibe komesa iha loron Segunda to´o Sesta ne´e laiha ema ruma mak hatama karta, signifika laiha manifestasaun.
`´Ita iha Díli iha regras prosedimentu lei regula atividade hotu-hotu, atividade ne´ebé mak ligadu ba protestu ne´ebé mak formal liu ténki iha regra, labele ema ida-idak hamrik nia fatin haksoit tun-sa’e ne´e labele. Kuandu halo asaun ne´ebé mak la tuir regra no prosedimentu ami sei bolu para halo klarifikasaun,``dehan Euclides Belo.Oly/avi
