Xefi Estadu Maior F-FDTL Major Jeneral, Lere Anan Timur, hatete, sira iha ona Brigadeiru Jeneral nain 4, maibe seidauk bele fo sai figura se mak atu troka Vise Xefi Estadu Maior F-FDTL, Brigadeiru Jeneral Filomeno Paixão, ne’ebé Governu aprova ona nia pedidu ezonerasaun.
“Ha’u seidauk bele fo sai, maibe iha Brigadeiru nain 4 kedan, no husi sira ida sempre sai, no sira nain hira ne’e mos sei asumi kargu ida ne’ebé mak todan, ne’e mak hanesan uluk ha’u dehan promosaun la’os defisil, buka fatin mos la’os difisil. Maibe agora ita hakarak halo buat hotu-hotu, ita-nia kapasidade bele halo buat ne’ebé mak ita hakarak ka lae? ida ne’e mak difisil,”dehan Lere Anan Timur ba Jornalista sira hafoin remata enkontru ho Prezidenti Republika iha Palasiu Prezidensial Nicolao Lobato kuarta (4/07/2018).
Lider máximu F-FDTL ne’e realsa tan, kona-ba ezonerasaun Brigaderiu Jeneral Filomeno Paixão, ne’ebé Governu aprova ona, antes atu ezonera laiha dúvida Prezidenti konvoka reuniaun superior defeza seguransa atu rona, depois sei marka loron ba tomada de posse.
“Ohin (horseik-red) ha’u hatete dehan katak, ha’u-nia preokupasaun mak ami-nia Ministru Defeza, agora Ministru Defeza laiha, Somotxo la bele ona, tamba Governu toma ona pose. Ha’u-nia dokumentu sira ba Ministéiru Defeza ne’e sei hein hela, ami-nia preokupasaun mak sira seluk, seidauk tomada de posse, pelo menus Ministru Defeza toma ona pose, para ami komesa hala’o ona ami-nia servisu,”esklarse Lere Anan Timur.
Antes ne’e, Brigaderiu Jeneral, Filomeno Paixão, aprezenta ona karta rezignasaun ba Prezidenti Repúblika, no Xefi Estadu Maior F-FDTL Major Jeneral, Lere Anan Timur, tamba hetan konvite atu asume knaar foun nuudar Ministru Defeza iha VIII Governu konstitusional.Oly
