Programa Nasional Dezenvolvimentu Suku hari’i uma ida ba Polisia Komunitária Ofisial Polisia Suku (OPS), iha Suku Wenuno Postu-Administrativu Metinaru, Munisipiu Dili.
Segundu Komandante Munisipiu Dili Superindente Polisia Euclides Belo agradese tebes ho apoiu ne’e, tanba bele fasilita OPS sira hala’o sira nia kna’ar ho diak.
“Ita fó agradese tebes ba PNDS ne’ebé halo ona uma ba Polisia OPS para fasilita Polisia Komunitaria atu hela hodi bele servisu hamutuk ho Autoridade lokal sira inklui komunidade iha Suku refere,” katak Euclides Belo ba GMN iha nia kna’ar fatin Caicoli Dili Sesta (13/07).
Euclides dehan, uma ne’ebé mak PNDS hari’i ba Polisia OPS iha Suku Wenuno Postu-Administrativu Metinaru ne’e, uma ne’ebé kualidade tebes, inklui ho ekipamentus mobiliáriu ne’ebe kompletu ba Polisia komunitariu sira.
“Polisia OPS atu ba hela iha ne’eba, lori de’it mak pasta ho roupa tanba, sasan dapur nian hanesan sanan, tasu, bikan, kanuru, kopu no saluk tan, kompletu ona iha ne’eba,” hateten euclides.
Nia hatutan Komando Munisipiu Dili fó ona orientasaun atu kuidadu uma ne’e, no mobiliáriu hot iha uma laran hanesan, tanba sasan hirak ne’e, hanesan patrimóniu instituisaun PNTL nian ona, no tenki kuidadu didiak atu ema labele hakerek paredi iha uma ne’e rasik.
“Presiza kontrolu para bele kuidadu uma no sasan sira ne’e ho diak, para bele dura nafatin, no uma ne’ebé mak Polisia OPS hela subfisiente, tanba uma ne’e luan tebes. Polisia OPS hela iha ne’eba para bele halo servisu ho autoridade lokal sira, inklui komunidade hodi tau matan ba situasaun iha Suku refere,” katak Euclides.aba
