Komandante Jeral Polísia Nasionál Timor-Leste (PNTL), Komisariu Julio Hornay, eziji ba Governu atu apoia kombustivel ba instituisaun PNTL hodi hala´o atividade operasional.
``Klaru mina laiha ita halo nusa? Se imajina kazu iha Ermera ka Ainaro ne’ebé sira atende labele presiza apoiu husi Unidade Polísia Espesial (UEP) ba bainhira mak sira atu to´o iha Munisípiu. Tanba ne´e mak sai ezijensia ida, mas prontu ita-nia Governu apezar situasaun hanesan ne´e mós ita-nia Governu tenta atu rezolve,``esplika Komandante Jeral PNTL Komisariu Julio Hornay, ba jornalista sira Tersa (24/07/18) iha Kuartel Jeral PNTL, Díli.
Julio Hornay, bolu ona diretor finansa instituisaun PNTL ninian hodi esplika kona-ba difikuldade kombustivel ne´ebé mak durante instituisaun ne´e inferenta.
``Ha´u bolu ona diretor finansa PNTL esplika, ha´u koalia ho diretor finansa ne´e katak, ohin (Horseik) ne´e sira tenta atu haree situasaun ida ne´e, para depois bele fó apiu ba Polísia hodi nune´e bele hala´o atividade operasional ho diak hodi mantein estabilidade no paz, ami espera katak, lalais bele hetan solusaun,``Julio Hornay.
Julio Hornay hatutan, agora dadauk stock kombustivel sei iha, maibe kombustivel ne´e utiliza liu ba atividade operasional membru balun stand by de´it iha Kuartel Polísia hodi suporta atividade operasional iha terenu.
Enkuantu durante ne´e, Kompañia Arju Mar mak fornese kombustivel ba instituisaun PNTL, agora dadauk kompañia refere hein hela pagamentu husi Governu hodi fornese tan kombustivel ba PNTL.
``Tanba ne´e mak ami hato´o ona ba Ministériu Finansa hodi rezolve situasaun ida ne´e,``dehan Julio Hornay.
Antes ne´e, Xefe Estadu Maior F-FDTL Major Jeneral, Lere Anan Timur, husu ba komandante sira bainhira kareta hodi hala´o servisu mak kombustivel laiha, husu atu deve, maibe deve ténki ho nota.avi
