Ajente Polísia Nasionál Timor-Leste (PNTL) ho inisiál FDF submete ona ba prosesu investigasaun tanba baku sidadaun ida iha eskuadra Polísia Atabae, munisípiu Bobonaro.
Porta-voz PNTL Superintendente Xefe Arnaldo Araújo esplika, kazu ne’e akontese iha Sábadu (04/07/20) mais ou menus tuku 12 meudia.
Iha akontesimentu ida kazu asaltu malu entre grupu rua akontese iha Giso, postu administrátivu Maubara, munisípiu Liquiça. Husi akontesimentu ne’e rezulta ema ida hetan kanek.
Iha momentu ne’ebá ajente Polísia iha fatin Giso halo atuasaun imediatamente lori suspeitu ba eskuadra Polísia Atabae atu foti joven ida ne’ebé mak kaptura nia deklarasaun, entaun iha momentu ne’ebá membru ne’e halo atuasaun ida la tuir regra disiplinár PNTL ni'an.
Ajente Polísia ne’e fó razaun katak, nia duni sidadaun kolen ho emosional mak ajente ne’e halo asaun ba sidadaun ne’e la tuir lei haruka. Ajente Polísia ne’e hasai grava rasik nia video.
“Tuir informasaun ne’ebé mak ha’u liga diretamente ho nia komandante PNTL iha Bobonaro, nia deklara nia rasik mak halo viral video ne’e, oras ne’e dadauk membru ne’e submete hela ba prosesu investigasaun iha Maliana. Husu ba vítima ne’ebé mak hetan agresaun fíziku husi PNTL atu fó informasaun loloos, atu nune’e ami-nia membru ne’e bele prosesu tuir lei ne’ebé mak iha”, esplika Porta-Voz PNTL Superintendente Xefe Arnaldo Araújo, ba jornalista sira, Kuarta (08/07/2020), iha Kuartel Jerál PNTL Díli.
Dadauk ne’e mós video agresaun fíziku envolve membru PNTL hasoru komunidade ne’e viral loos iha media sosial. avi
