Eis Prezidente Parlamentu Nasionál (PPN), Arão Noe, informa, lei kriminaliza difamasaun sei halakon liberdade espresaun no imprensa, enkuantu Timor-Leste adopta hela sistema Estadu Direitu Demokrátiku.
“Agora ita hakarak hatama fali tau hanesan krime públiku ni’an ita kriminaliza, ita hakiduk fali ba kotuk, ita komesa proibi ona liberdade ema ni’an atu halo espresaun, sé líder ruma sente prejudikadu bele halo keixa, la presiza kriminaliza, tanba ne’e, ha’u kontra tanba demokrasia, ita lakon tiha ona liberdade imprensa no espresaun, laiha ona ida ne’e, tenke tuir ona gostu, sé mak ukun bele mós iha ona presegisaun polítika bele iha tan mós prijoneiru polítiku“, Eis PPN ne’e ba jornalsita sira iha PN, Kinta (16-07-2020).
Tuir Arão, loloos ne’e wainhira ema ruma sai figura públiku, tenke simu krítika husi públiku, tanba ne’e normal no Timor-Leste rasik adopta hela sistema Estadu Direitu Demokrátiku.
“Ita sai ona figura públiku, ita tenke simu krítika husi públiku loro-loron no trata, maibé ida ne’e normal, ha’u sente la lakon buat ida, tanba nu’udár ema sarani Katólika sé mak trata ha’u, nia mak sala la’ós ha’u mak atu ba konfesa, sente prejudikadu hato’o keixa, la presiza kriminaliza aktu hirak ne’e”, afirma Arão.
Projeitu lei refere to’o ohin loron sei iha Ministériu Justisa (MJ) no sei iha faze halo konsulta ho entidade relevante sira, no dau-daun ne’e hetan krítika maka’as husi públiku.
Antes ne’e mós Front Mahasiswa Timor-Leste (FMTL) liu husi konferénsia ba imprensa kontra mós lei kriminaliza difamasaun, tanba lei ne’e sei hamate liberdade imprensa no espresaun iha Timor-Leste. ety
