Embaixadór Republik Indonesia (RI) ba Timor-Leste, Sahat Sitorus, oferese Mie Sedap kaixa 900 resin ba Polísia Nasionál Timor-Leste (PNTL).
Seremonia entrega Mie Sedap ne’e hala’o iha Kuartel Jerál PNTL, Kaikoli, Díli, Kuarta (15/07/20).
Apoiu ne’ebé mak Embaixadór, Sahat Sitorus, entrega ba PNTL ne’e hetan apoiu husi Kompañia Mie Sedap Indonézia iha Díli, Timor-Leste.
Ho apoiu hirak ne’e, sei hametin liu tan kooperasaun PNTL ho embaixada Indonézia iha Timor-Leste.
“Ita tenke servisu hamutuk hodi kaer metin kooperasaun ida ne’e, bainhira akontese buat ruma, ita bele rezolve hodi bele hetan solusaun”, esplika Embaixadór Indonézia ba Timor-Leste, Sahat Sitorus.
Alende ne’e, Sahat Sitorus, louva Estadu Timor-Leste no Komandu jerál PNTL ho membru tomak hodi asegura Estadu Emerjénsia, hahú iha fulan Marsu to’o remata iha fulan Juñu, tinan ne’e, ikus mai livre husi COVID-19.
Ne’e hatudu regra Estadu ni'an la’o diak no disiplina husi komunidade no Estadu hala’o nia kna’ar ho di'ak, hodi halo prevensaun COVID-19.
Seluk fali wainhira Estadu Emerjénsia remata, komunidade sira hala’o fila-fali sira nia aktividade hanesan bai-bain.
Tuir Embaixadór ne’e, sé wainhira Estadu Emerjénsia kontinua sei fó impaktu ba inflasaun ekonomia sei a’as no sei ema barak mak sei lakon servisu.
Alende ne’e, Komandante Jerál PNTL, Komisáriu Faustino da Costa, agradese ba Kompañia Mie Sedap Timor-Leste, ne’ebé mak apoiu ona Supermie ba iha instituisaun PNTL. Inklui agradese ba Embaixadór Indonézia ba Timor-Leste, Sahat Sitorus no adidu seguransa Indonézia ba Timor-Leste.
“Apoiu ne’e hanesan ba dahuluk husi kompañia Mie Sedap ba PNTL, hanesan ohin ami koalia tiha ona, apoiu ne’e la’os ba dala ikus ona, maibé sei kontinua, sei haree koordenasaun oinsá ba oin”, dehan Faustino da Costa.
Tuir planu supermie kaixa atus sia resin ne’e sei distribui ba membru PNTL sira. avi
