Komandante Jerál Polísia Nasionál Timor-Leste (PNTL), Komisáriu Faustino da Costa, hatete, nia parte simu ona informasaun katak iha ninia membru balun halo ona juramentu ba partidu Kmanek Haburas Unidade Nasional Timor-Oan (KHUNTO). Tanba ne’e, membru PNTL sira ne’e sei prosesu hotu kedas.
Faustino da Costa hateten, PNTL instituisaun Estadu la mete ba partidu, maibé iha membru balun mak nia rona envolve iha partidu KHUNTO, hodi halo juramentu.
Tanba ne’e, líder masímu instituisaun PNTL, Komisáriu Faustino da Costa, promete sei bolu ema sira ne’e atu submete ba prosesu investigasaun.
“Intervensaun hanesan ohin ha’u iha provas ema sira ne’e sei prosesu hotu kedas, ne’e la’os ba partidu ne’ebé mak ita boot sira temi (KHUNTO), maibé ba partidu saída de’it”, esplika Komandante Jerál PNTL, Komisáriu Faustino da Costa, ba jornalista sira Kinta (02/07/20) iha Kuartel Polísia Caicoli-Díli.
Antes ne’e mós Arsebispu Metropolitanu Arkidioseze Díli, Dom Virgílio do Carmo da Silva, SDB, hateten, igreja Katólika firme no kontra nafatin seremonia ritual sira ne’ebé halo hodi koa ran no juramentu hodi dada ema ses husi dalan los. avi
