Komandante Jerál Polísia Nasional Timor-Lorosaé (PNTL), Komisáriu Faustino da Costa, informa, halo mudansa ba estrutura komandante munisípiu no unidade hamutuk 25, la’os desizaun polítika.
Faustino esplika, instituisaun PNTL, iha ofisiáis no superiór ne’ebé mak komanda iha Unidade, tantu mós iha munisípiu iha balun tinan 5 to’o tinan 10.
Tuir nia, kargu ne’ebé mak ofisiáis no superiór sira asume kleur liu, tanba ne’e, presiza halo mudansa estrutura Komandante munisípiu no unidade.
“Objetivu ne’e klaru tiha ona, prosesu transférensia ba komandante sira ne’e prosesu kleur ona, ne’e nein kestaun polítika laiha. Ha’u atu dehan ai-funan fresku ida kuda iha vazu ida nia abut labele tun ba rai hodi estraga rai ne’e rasik, agora ita book uitoan iha parte ida, depois iha loron tuir mai ita haree vazu ne’e tuan, ita muda tiha ba fatin ruma, loron labele habai depois ita tau fali vazu foun ida ne’ebé mak fresku, atu nune’e ita tau ai-funan ne’e bele fresku nafatin”, Komandante Jerál PNTL ne'e ba jornalista sira Kinta (02/07//20), iha Kuartel Polísia Caicoli, Díli, hafoin partisipa iha serimonia despedida entre Komandante PNTL munisípiu Díli Anteriór, Superintendente Xefe Armando Monteiro no simu Superintendente Xefe, Henrique da Costa, komanda PNTL munisípiu Díli.
Alende ne’e, Komandante PNTL munisípiu Díli, Superintendente Xefe, Henrique da Costa, promete, durante mandatu sei buka redus kazu krime sira ne’ebé mak akontese iha Díli laran.
“Ha’u sei la servisu mesak, maibé ha’u fiar katak ho apoiu ema hotu ni'an, mehi ne’ebé mak ha’u iha hakarak atu lori munisípiu Díli moris iha trankulidade nia laran”, dehan Henrique.
Iha fatin hanesan Komandante PNTL munisípiu Díli anteriór, Superintendente Xefe Armando Monteiro, agradese ba komunidade iha Díli, ne’ebé mak durante ne’e koopera ona ho autoridade seguransa hodi garante estabilidade.
“Servisu susesu ne’ebé mak ita hetan la’os susesu ba ita maibé susesu ba ita hotu, tanba apoiu husi parte hotu-hotu. Ami laiha kbi'it ida atu selu imi nia esforsu tomak ida ne’e, maibé hanesan umanu durante ha’u nia atendimentu no ha’u nia étika no komunikasaun lori ami-nia estrutura tomak seriu ba ita nia komunidade iha Díli ladun kontente ladun monu, ladun satisfas karik iha ha’u nia mandatu, ha’u ema sala na’in, ha’u husu deskulpa, espera katak ho imi nia kritika no akompañamentu sai hanesan konstrutivu ba ami nia atendimentu ba komunidade diak liu tan iha mandatu Komandante PNTL foun tuir mai”, dehan Armando.
Komandante PNTL munisípiu Díli, Superintendente Xefe, Armando Monteiro, simu ona pose iha loron 1, fulan Juñu, tinan ne’e, hodi komanda fali PNTL munisípiu Baucau no Superintendente Xefe, Henrique da Costa, Komanda fali PNTL munisípiu Díli. avi
