GMN TV Justica e Segurança Komisaun A finaliza ona relatóriu lei MPCC

Komisaun A finaliza ona relatóriu lei MPCC

0 views

Deputadu sira husi komisaun A ne’ebé trata asuntu justisa no konstitusionais iha Parlamentu Nasional (PN) konsege finaliza ona relatóriu finál no pareser téknika kona-bá lei Medida Prevensaun Kombate Korupsaun (MPCC_sigla portugés) ho total artigu hamutuk 118.

Prezidente komisaun, Joaquim do Santos, informa, durante loron 2, hafoin adia ajenda votasaun finál global iha plenária semana ne’e, komisaun A konsege halo redusaun artigu balun ne’ebé konsidera ladun importante hosi projetu lei refere, ho nune’e hosi artigu anterior ne’ebé hamutuk 121 konsege redus to’o 118.

“Ohin ami konsege aprova ho unanimidade testu finál lei medida prevensaun kombate korupsaun, ho artigu entrada em vigór ne’e 118 artigu, porposta uluk ne’e to’o artigu 121, maibe ami haree fila fali, iha artigu balun ladun importante, ami hasai tiha fila”, Deputadu bankada FRETILIN, Joaquim do Santos, hato’o asuntu refere ba jornalista sira iha PN, Kinta (16/07/2020).

Joaquim hateten, armoniza lei ne’e tuir prosesu lejístiku interna liga ba publikasaun aktu no liga ba interpretasaun lei sira seluk nian, liu-liu kódigu penál ho liafuan sira jurídiku ne’ebé atu labele implika iha interpretasaun sala karik, nune’e iha loron rua ne’e PN ajusta hotu ona estrutura lei nian.

Depois objetivu mós ami re-define fali objetivu lei ne’e. Uluk fo-foun ne’e ko’alia de’it ba krime, iha tan introdusaun prevensaun ba korupsaun ne’e, entaun ita re-formula fali ninia objetivu, hodi nia objetivu ne’e kobre hotu kedas prevensaun ninia”, esplika prezidente komisaun A ne’e.

Nia haktuir, relatóriu finál ne’e sei baixa kedas ba gabinete Prezidente PN, atu bele ajenda ba diskusaun no votasaun finál global.

“Dokumentus ne’e orsida haruka ona ba Prezidente PN,  no konforme ha’u rona hosi prezidensia nian katak, atu ajenda ba loron Segunda ou Tersa, maibe ne’e konfome kompetensia Prezidente nian, maibe ami nia servisu ohin finál ona”, tenik deputadu Joaquim do Santos.

Projetu lei medidas prevensaun kombate korupsaun ne’e, propoin hosi deputadu sira bankada PD ho Fretilin, iha loron 9, fulan Jullu, tinan 2018, atu hodi garante boa governasaun no dignidade integridade Estadu nian.

No lei ne’e rasik, baixa ba komisaun A hodi kontinua diskute iha espesialidade, iha loron 18 fulan Marsu tinan 2019, hafoin diskute no aprova iha faze jeneralidade ho unanimidade, maske deputadu balun la marka prezensa iha plenária momentu ne’ebá, ho nune’e votus afavor 47, kontra 0 no abstensaun 0.

Entertantu, komisaun A aprova relatóriu finál ne’e, ho votus unanimidade, maske membru komisaun A na’in rua la marka prezensa, hanesan deputadu António Nobre, tanba partisipa iha semináriu komisaun C nian iha Baucau, inklui deputadu Adriano do Nascimento ne’ebé kondisaun saúde la permite, tanba ne’e votus a favor 9, kontra 0 no abstensaun 0. Say


Banner

Foto

Notisia Ikus

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...

Governu preparadu antesipa La Niña

September 22, 2021
Sekretariu Estadu Protesaun Sivíl (SEPS), hala...

FP mate, naran nafatin iha lista liña frente, KFP tenke investiga

September 22, 2021
Parlamentu Nasionál (PN), liu hosi bankada CNRT...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker