Komandante Komponente Navál Ligeira FALINTIL-Forsa Defeza Timor-Leste (F-FDTL), Kapitaun Fragata João da Silva, hateten, ró-ahi F-FDTL ni'an ba Jaco no Betano para de’it iha Komponente Naval Hera, tanba laiha manutensaun.
João da Silva, hateten, tuir loloos Naviu Repúblika Timor-Leste (NRTL) Jaco no Betano, tenke hasa'e ona ba rai maran hodi halo manutensaun, maibé tanba laiha orsamentu, ró refere para de’it durante tinan tolu, iha portu Komponente Naval Hera.
“Kuaze tinan tolu ou hat ona ita la halo operasaun, tanba laiha manutensaun ida di'ak dezde primeiru skalaun até treseiru skalaun”, esplika Komandante Komponente Forsa Navál Ligeira F-FDTL, Kapitaun Fragata João da Silva, ba jornalista Kinta (23/07/20), hafoin ensera ezersisiu, SEACAT, iha salaun enkontru Komponente Naval, Hera.
Maske nune’e, Komandante Komponente Naval João da Silva, optismita katak, Governu iha tinan 2021 Governu sei tau orsamentu, hodi halo manutensaun ba ró rua refere.
“Ne’e depende vontade polítiku kona-bá manuténsaun sira ne’e, Komandante Komponente Naval ha’u optimista katak iha tempu badak polítika sira bele haree kona-bá manuténsaun sira”, dehan João.
Ró NRTL Jaco no Betano, Governu Timor-Leste sosa husi Xina, iha tinan 2010, ne’ebé mak operasionálmente opera husi membru kapitaun Forsa Komponente Naval F-FDTL. avi
