Xefe Estadu Maior Jeneral FALINTIL-Forsa Defeza Timor Leste (F-FDTL), Maijor Jeneral Lere Anan Timur, fó votu susesu ba Oitavu Governu konstituisional, ne’ebé lidera husi Xefe Governu, Taur Matan Ruak.
Antes ne’e, Oitavu Governu Konstituisional ne’ebé mak hahoris, husi partidu CNRT, PLP no KHUNTO membru Governu la kompletu.
Maibé, hafoin koligasaun refere nakfera, mosu kedas polítika foun, iha Parlamentu Nasionál, ne’ebé forma husi partidu FRETILIN, PLP, KHUNTO no ikus mai konsege kompleta ona estrutura Oitavu Governu, hamutuk 43.
“Ita hatene katak ita nia governu la’o di’ak ita hein katak ita nia susesu ba sira nia dalan ne’ebé mak sei naruk ate 2023 ne’e halo oinsa para ita nia povu bele moris hakmatek no moris haksolok moris iha dezenvolvimentu ne’e mak importante liu”, dehan, Major Jeneral Lere Anan Timur, iha Palásiu Presidensiál Nicolau Lobato, Bairro-Pite, Kuarta (08/07).
Alende ne’e, nia husu ba líder nasional sira atu labele kria konfuzaun ba populasaun sira, hodi trata malu no akuza malu, maibé dalan di’ak liu mak buka lia loos iha tribunal.
“Dalaruma ita nia komunidade, populasaun, juventude sente konfuzu tanba ami líder sira ne’e mak tau konfuzaun ba sira nia ulun, liu-liu líder istóriku sira 74 kritika malu pur ezemplu imi rona Abilio Araújo, Rogerio Lobato, Luis Guterres sira akuza malu, loloos-loloos ne’e mak maun Marí halo ne’e nia nono'ok ba tribunal, lalika kanta demais iha públiku para kria konfuzaun ba ema”, deklara, Major Jeneral Lere Anan Timur.
Tuir Lere, hanesan líder nasionál, maske mosu tentativa oi-oin, maibe tenke iha konsiensia, hodi hanoin fila-fali hanesan uluk halo funu iha ai-laran.
entretantu Oitavu Governu ne’ebé lidera husi, Primeiru Ministru, Taur Matan Ruak, sei remata ninia mandatu iha tinan 2023. Ina
