Xefe Estadu Maior F-FDTL Majór Jenerál Lere Anan Timur, husu Governu atu fó autónomu orsamentu ba instituisaun militar ne’e, atu nune’e F-FDTL bele jere rasik nia osan, tanba ofisiál F-FDTL nian preparadu no treinadu atu halo jestaun rasik.
Tuir nia, F-FDTL de’it mak hatene liu nia problema no difkuldade iha área militar nian.
“Ami hateten ona atu governu fó instituisaun militar nia osan para ami jere rasik, hau nia oficias bele ona, hau nia oficiais ba estuda iha liur ne’ebá ne’e, la’os ba loron ida rua de’it, maibe ba to’o tinan, ne’eduni sira bele ona jere sira nia moris rasik iha instituisaun nia laran. Ho ida ne’e mai ha’u sei haruka karta ba governu, hodi fó ami nia osan para ami jere rasik, hodi repsonde problema ne’ebé mak forsa armada enfrenta”,hateten Lere iha kuartel F-FDTL, Tersa(30/06/2020).
Alende ne’e, Majór Jenerál F-FDTL ne’e mós husu governante sira, atu labele hala’o mak polítika hodi hatun malu, maibe presiza konsentra ba dezenvolvimentu iha setór hotu no kria kondisaun ba instituisaun hotu, nune’e labele dependéncia beibeik ba nasaun seluk nia tulun.
“Ha’u husu ba governu, ita labele hein de’it doasaun loron-kalan, tane liman husu obrigadu de’it, governu tenke esforsu hodi kria kondisoens ba nia instituisaun hotu-hotu. La’os lor-loron mak polítika, polítika de’it, hanoin mak hatun no hasa’e malu, depois ita mak loron-kalan hein obrigadu, obrigadu de’it ba ema, ita Timor ne’e nasaun soberanu, governu tenke toma ona konsiensia, ita labele dependénsia demais, ita tenke hatene moris mesak”,tenik líder militar ne’e.
Entertantu, durante ne’e, Governu Timor-Leste, aloka orsamentu jerál estadu ba Falintil forsa defeza Timor-Leste ka F-FDTL, liu hosi Ministériu Defeza.Say
