Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál, Lere Anan Timur, husu ba membru Polísia Militar hotu atu hatudu uluk disiplina, hafoin hatudu ba nia membru sira seluk hodi banati tuir.
“Kestaun disiplina primeiru disiplinadu sai banati ba militar sira seluk-seluk. Polísia Militar nia hatais tenke sai ezemplar ba militar seluk-seluk atu hatais tuir Polísia Militar, sa’e kareta tenke tuir regra atu bele kontrola membru sira seluk-seluk”, esplika Xefe Estadu Maiór FALINTIL Forsa Defeza Timor-Leste (F-FDTL), Majór Jenerál Lere Anan Timur, ba jornalista sira Segunda (13/07/20), hafoin abertura treinamentu Maubere Lima ba Polísia Militar iha Kintal Boot, Díli.
Tuir Lere, durante ukun-an kuaze forsa armada hala’o Polísia nia servisu hotu.
“Entaun ikus mai ita nia forsa sira hela metin iha Kuartel hodi hala’o Polísia Militar nia servisu, haruka ba fronteira para sira hala’o misaun rasik”, dehan Lere.
Alende ne’e, iha treinamentu Maubere Lima envolve membru Polísia Militar hamutuk 45, ne’ebé mak sei hala’o treinamentu durante fulan tolu (3), hahú iha fulan Jullu no tuir planu sei remata iha fulan Setembru nia-laran.
Treinamentu ho durasaun fulan 3 ne’e foka liu ba disiplina militar, ne’ebé mak sei hanorin instrutór Polísia Militar Timor-Oan no apoiu husi Polísia Militar Brazil.
Membru F-FDTL sira ne’ebé mak partisipa iha treinamentu ne’e mai husi forsa ativu ne’ebé mak rekruta husi Komponente Formasaun Treinu Metinaro, Komponente Apoiu Servisu, Komponente Terestre Baucau, la inklui Komponente Naval. avi
