Vise Ministru Administrasaun Estatal (MAE), Lino de Jesus Torrezão, konsidera, Suplementu Remuneratóriu ne’ebé oferese ba pesoal saneamentu ne’e kria injustisa, tanba ne’e, sei aprezenta fila-fali ba Konsellu Ministru (KM).
“Normalmente ha’u akompaña iha televizaun kona-ba sira nia halerik, tuir loloos ida ne’e diskriminasaun bo’ot ida, tamba atu selu ou la selu, maibé ne’e diskriminasaun, konformi informasaun ne’ebé ha’u rona katak, sira loron ida simu USD 5, ida ne’e mak ita atu haree didiak, ita koalia oinsa atu propoin fila-fali, atu selu ho justisa ne’e, ita kria injustisa boot ida ba sira,” deklara, Vise Ministru Administrasaun Estatal, Lino de Jesus Torrezão, iha Palásiu Governu, Tersa (07/07/2020).
Governante ne’e hatutan, nia parte sei aprezenta fila-fali ba Konsellu Ministru (KM) atu haree fila-fali, kona-ba subsídiu ne’ebé mak atu oferese ba pesoal saneamentu.
“Diak liu ita aprezenta fila-fali ba KM hodi haree fila-fali, tamba iha ona ekipa rekoperasaun ekonomia ida, ne’e komesa halo levantamentu dadus oinsa mak bele, hetan hotu subisídiu ne’e,” afirma, Vise Ministru MAE ne’e.
Lino de Jesus Torrezão relata, foin lalais ne’e enkontru ho ekipa rekoperasuan ekonomia, hato’o ona kona-ba sitiuasaun refere, atu nune’e ema hotu bele hetan osan ne’ebé destinadu husi COVID-19.
“Foin dada’uk ha’u halo enkontru ho ekipa rekoperasaun ekonomia ne’ebé lidera husi Rui Gomes, ida ne’e ami hato’o ona, Rui Gomes hatan ona, oinsa mak halo levantamentu dadus, ema hotu bele hetan osan ne’ebé destinadu mai husi Covid-19,” tenik, Vise Ministru ne’e.
Vise Ministru ne’e esplika, koalia kona-ba rekoperasaun ekonomia iha situasaun rua, ida mak rekopera situasaun ne’ebé mak ladun favorese ba sira para bele tama fila-fali, iha rekoperasaun ekonomia nia laran, hodi nune’e bele responde ba sira nia nesesidade no ezijensia.
“Kona-ba atu fo sumplementu remuneratóriu ba, pesoál saneamentu ho justu ne’e desizaun KM no Primeiru Ministru mak bele hatene,” afirma, Vise MAE ne’e.Cin
