Membru husi Komponente Naval FALINTIL Forsa Defeza Timor-Leste (F-FDTL) deskonfia baku tan vítima Loreno Fatíma da Costa to’o agrava no bubu iha isin-lolon.
Porta-Voz Zebedeo Monteiro Pinto, hateten, iha Kinta (23/07/20) mais ou menus tuku ualu kalan, iha Bairu Manu-Metan Rai Hun, Suku Villa-Verde, Postu Administrátivu Verra-Cruz, Díli, membru F-FDTL Komponente Naval ho kareta ida kompleta ho armas militar hanesan farda no kilat, no sira la hatene kona-bá kronolojia husi akontesimentu iha fatin refere, hodi halo aprosimasaun profisional hasoru komunidade, maibé forsa armada sira to’o halo kedas atuasaun krime hodi tuku no tebe vítima Loreno Fatíma da Costa, hodi rezulta vítima sofre agrava no bubu iha isin-lolon.
Ho aktu krime refere porta-Voz husi Lezada Zebedeo Monteiro Pinto, konsidera, atuasaun membru forsa armada ne’e la profisional
“Ho asaun ida ne’e ami família konsidera hahalok brutalizmu ne’ebé uluk militar Indonézia nian hasoru komunidade iha temppu okupasaun Indonézia. Nune’e ami família husu parte kompetente atu loke prosesu investigasaun ba membru F-FDTL ne’ebé mak hahalok a’at ne’ebé halo hasoru família Loreno Fatítima da Costa, atu prosesa membru sira tuir dalan legal”,esplika Porta-Voz husi Lezada Zebedeo Monteiro Pinto, ba jornalista sira Segunda (27/07/20), liu husi konfrénsia ba imprénsa, iha bairu Manu-Metan Rai Huun .
Alende ne’e vítima Loreno Fátima da Costa haktuir kronolojia agresaun fíziku husi membru Komponente Naval ne’e akontese, hafoin problema balun entré sidadaun balun iha bairu Manu-Metan Rai-Hun, maibé hetan fali agresaun husi membru Komponente Naval.
“Tanba ne’e ha’u sei levanta kazu ne’e ba iha Ministériu Públiku no Provedória Dereitus no Humanus no Justisa no se kontinua ba Parlamentu Nasionál,dehan Loreno Fatítima da Costa.
Lezadu nia ina María Lucia de Fatíma, konsidera atuasaun membru Komponente Naval la ho professional tanba ne’e nia husu ba Komando F-FDTL atu foti medida hasoru membru Komponente Naval sira.
“Atuasaun ida ne’e la tuir regras no la tuir lei, núdar inan ida ha’u la simu, asaun kriminozu ne’e dala ruma sira halo rai Timor ne’e labele aman, ne’e mak oituan barak-oituan barak sira baku ema sivil ne’e”,dehan María Lucia de Fatíma.
Antes ne’e iha loron 21 fulan ne’e iha Liquisa villa, habitante ida mós hetan agresaun fiziku husi membru Komponente Naval no Polísia Nasionál Timor-Leste Liquisa. avi
