Xefe Estadu Maior Jeneral Falintil-Forsa Defeza Timor-Leste (F-FDTL) Major Jeneral, Lere Anan Timur, husu ba deputadu sira iha Parlamentu Nasional (PN) ne’ebé deskonfia membru F-FDTL balun halo juramentu ba partidu polítiku sira tenke hatudu evidensia, no labele halo membru F-FDTL sira deskonfia malu iha instituisaun laran.
“Ha’u dehan katak o jura ba partidu, o jura ba ha’u la hatene, tanba ha’u la iha informasaun ne’e mak aban bainrua ami ezije parlamentu, kuandu sira ibun boboot ne’e hatudu evidensia se mak jura ba partidu? se mak jura ba artemarsiais? keta ha’u ka Falur, Koliati ka? keta se-se deit temi nia naran la bele halo ami deskonfia malu iha instituisaun nia laran”, dehan Major Jeneral Lere Anan Timur ba jornalista sira, Kuarta (15/07/2020), iha Palásiu Prezidensial Nicolau Lobato, Bairo Píte, Díli.
Nia salienta, foin dadauk sira deskonfia malu duni, dehan katak sira nia ofisiais fahe kilat, dehan mos ofisiais sira mak fahe kareta, afinal ba haree buat ida la iha, ema hakarak fahe deit. “Uluk Indonézia nia tempu hakarak fahe agora hakarak fahe nafatin, sira iha parlamentu tenke koñese sira-nia an, não me digas sira hotu iha ne’eba rezisténsia nia ema, sira iha ne’eba autonomista mak barak,” dehan tan Lere.
“Agora defende sira-nia tasu, defende nia família, defende nia pensaun vitalísia, ami hanesan mos veteranu ami mos ezije ami nia pensaun 24 anos la’os 5 anos, ami sei ezije, ha’u bele dehan ami bele rezolve situasaun, ou sobu depois mak rezolve fali se mak dehan la bele, ne’e mak ha’u hanoin deputadu sira koalia naton, la bele dehan ida diak liu fali no ida a’at liu fali”, akresenta Lere.
Nia hatutan “Uluk nia deklara katak, saida mak nia interese saida mak importante ba nia soldadu tenke leal ba nia, leal ne’e signifika saida? nia dehan ba mate, ba mate, dehan haksoit husi andar tun mai tenke haksoit, tanba nia alin sarjentu Abriu la leal ne’e mak nia duni sai aban bainrua mos sei hanesan ne’e nafatin se mak la leal ba komandu ba uma”. Oly
