Tuir ajenda ne’ebé aprova iha reuniun líder bankada iha semana kotuk, tuir loloos iha plenária Tersa-feira ne’e, deputadu sira kinta lejislatura, atu halo votasaun final global, ba projetu lei númeru ida, kinta primeira Lei Anti Korupsaun (LAK), maibe adia hikas, tanba komisaun A ne’ebé trata asuntu justisa no konstitusionais sei hadi’ak eru tékniku balun hosi projetu lei refere.
Prezidente komimsaun A, deputadu Joaquim dos Santos Borluli, informa, maske ajenda votasaun ne’e adia, maibe sei la lori tempu naruk, tanba ne’e, karik Prezidente Parlamentu ajenda hikas ba plenária estraordináriu iha semana ne'e ou tarde liu plenária semana oin bele aprova ona.
“Ita nia asesor sira jurídiku konsege detekta eru tékniku balun, liu-liu liga ba redasaun lei ninian ne’e, ne’ebé tenke haloos, ne’e mak ohin loraik (horiseik-red) sei ajusta problema téknikus balun,” informa deputadu Joaquim, ba jornalista sira iha PN, Tersa (14/07/2020).
Iha projetu LAK ne’ebé iha tempu badak halo ona aprovasaun final global, kuaze artigu 120.
Entretantu, projetu LAK ne’e, aprezenta husi deputadu bankada Fretilin ho PD, diskute no aprova ona iha jeneralidade ho espesialidade.
Projetu LAK ne’e, aprezenta dahuluk iha mandatu terseira legislatura, maibe la konsege diskute, tanba ne’e, adía ba Kuarta lejislatura, kontinua kaduka, maibe inisiativa deputadu sira kinta legislatura, konsege hetan ona aprovasaun iha jeneralidade no espesialidade ho unanimidade. Say
