GMN TV Justica e Segurança PN Sei konsulta ho asesór jurídiku kona-bá petisaun husi jornalista

PN Sei konsulta ho asesór jurídiku kona-bá petisaun husi jornalista

0 views

Prezidente Parlamentu Nasionál (PN), Aniceto Guterres, hateten, kona-bá petisaun husi jornalista na’in 31, nia parte sei konsulta ho asesór jurídiku sira PN ni’an molok foti desizaun, tanba petisaun ne’e presiza trata ho regra rejimentál.

“Ha’u simu tiha ona ha’u sei rona lai pareser husi asesór sira, hodi trata halo nusá, tanba iha regra ketak ida ba buat ida bolu petisaun ne’e, ne’ebé tenke la’o tuir regra rejimentál prosesu atu trata petisaun”, Prezidente PN ne’e ba jornalista sira iha Pn, Kuarta (15-07-2020).

Nia hatutan, kualker petisaun ne’ebé mak PN simu tenke trata tuir regra  rejimental parlamentu ni’an.

Tuir Rejimentu Parlamentu Nasionál (RPN) artigu 155 (Ezersísiu direitu ba petisaun) alínea 1, hateten, direitu ba petisaun ne’ebé prevé iha artigu 48 husi Konstituisaun no iha lei, ne’e ezerse liu husi petisaun, reklamasaun ka keixa ne’ebé aprezenta ba PN.

Alinea 2 husi artigu ne’e esplika, wainhira de’it temi liafuan “petisaun”, signifika katak liafuan ne’e aplika ba modalidade hotu-hotu ne’ebé temi iha númeru anteriór.

Purtantu artigu 156 (forma) alínea 1 esplika, petisaun tenke hakerek no iha identifikasaun husi ninia titulár ho nia hela-fatin, na’in tenke asina ka ema seluk mak asina, tanba nia husu, wainhira labele asina ka la hatene asina.

Alínea 2 husi 156 ne’e hateten, petisaun tenke kompreensível no espesifika momós ninia objetu. Alínea 3 subliña, petisaun ne’ebé iha autór lubuk ida, natoon ona identifikasaun husi signatáriu ida de’it.

Nune’e mós Konstituisaun RDTL artigu 48 (direitu petisaun ni’an) sidadaun hotu-hotu iha direitu atu aprezenta petisaun, kesar no reklamasaun, mesak-mesak eh iha grupu, ba órgaun soberania sira, eh ba autoridade selu-seluk atu defende sira-nia direitu, Lei-Inan, lei-oan eh ba interese ema hotu nian.

Enkuantu jornalista 31 hatama petisaun ba PN ne’e iha loron 9, fulan Jullu, hodi kestiona legalidade husi eleisaun ne’ebé Konsellu Imprensa organiza  iha loron 4, fulan ne’e.

Antes ne’e, Asosiasaun Jornalista Timor-Leste husu Prezidente PN anula tiha petisaun husi jornalista 31, tanba sira viola desizaun konferénsia AJTL, hodi hili Virgílio Guterres hanesan membru AJTL ne’ebé sai nu’udár membru Konsellu Imprensa iha periódu tinan 2020-2024. ety


Banner

Foto

Notisia Ikus

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...

Governu preparadu antesipa La Niña

September 22, 2021
Sekretariu Estadu Protesaun Sivíl (SEPS), hala...

FP mate, naran nafatin iha lista liña frente, KFP tenke investiga

September 22, 2021
Parlamentu Nasionál (PN), liu hosi bankada CNRT...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker