Polísia Nasionál Servisu Investigasaun Kriminal (PNSIK) intrega sidadaun estranjeiru 13, ba servisu Migrasaun hodi hala’o prosesu kontinuasaun hafoin hala’o deportasaun.
Sidadaun estranjeiru na’in 13, antes ne’e submete ona ba prosesu investigasaun iha PNSIK no iha Tersa (14/07/20), PNSIK entrega ona sidadun 13 ne’e ho evidensia hanesan pasaporte 11 no telemovel 12 ba iha Servisu Migrasaun, hodi kontinua hala’o prosesu kontinuasaun.
Sidadaun sira ne’e, entrega asiste dereitamente husi adidu Polísia Indonezia ba Timor-Leste, Komisaris Besar Polisi, Muji Diah Setiani no Reprezentante International Organization for Migration (IOM) iha Timor-Leste.
Diretór Servisu Migrasaun, Superintendente Xefe Agustinho Gomes, esplika, sidadaun hirak ne’e, PNSIK entrega ba Migrasaun, hafoin hetan despaixu husi Ministériu Públiku (MP) munisípiu Baucau.
“Ne’ebé hahú ohin ba oin ema na’in 13 ne’e sai responsabilidade Dirésaun Jerál Migrasaun para atu kontrola, depois sira sei investiga tuir lei Migrasaun nian, depois hare’e oinsa atu desizaun loos ba sira”, esplika Diretór Servisu Migrasaun, Superintendente Xefe Agostinho Gomes, ba jornalista sira, Tersa (14/07/20) iha YQ Hotel, Raikotu-Díli .
Kona-bá sidadaun Vietname sira nia embaixada iha Timor-Leste, Diretór Migrasaun, Agostinho Gomes, dehan, Migrasaun ho IOM sei servisu hamutuk hodi prosesa ema sira fila-fali ba sira nia nasaun.
Alende ne’e, adidu Polísia Indonezia ba Timor-Leste, Komisaris Polisi, Muji Diah Setiani, hateten, embaixada Indonézia hein prosesu investigasaun husi Migrasaun Timor-Leste, hafoin sei haruka sira ninia sidadaun fila-fali ba Kendari, Sulawesi Tenggara, Indonezia.
“Sidadaun Indonézia ne’e, hanesan ema peskadór husi Kendari Propinsia Sulawesi Tenggara, ne’ebé mak sira lori ema Vietname 11 no ita koordena ona ho PNTL no halo ona pasa revista ba sidadaun sira ne’e, depois ema sira ne’e hela iha kuarentena no Embaixadór Indonézia iha Díli, Sahat Sitorus hala’o ona sorumutu ho PNTL iha semana rua ba kotuk no IOM, inklui Ministru Saúde” , dehan Komisaris Polisi, Muji Diah Setiani.
Sidadaun estranjeiru sira ne’e terdampar iha illa Jaco, Lautem, iha loron 12, fulan ne’e. avi
