Komandante Polísia Nasionál Timor-Leste (PNTL) munisípiu Díli, Superintendente Xefe Henrique da Costa, hateten, komando ho igreja Katólika sei servisu hamutuk hodi kria paz no estabilidade iha Díli laran.
Superintendente Xefe Henrique da Costa, hato'o lia hirak ne’e, hafoin sai hanesan Komandante PNTL munisípiu Díli foun, hodi ba aprezenta-an iha Arsebispu Dioseze Metropolitana Díli, Dom Virgílio do Carmo da SIlva, SDB, iha Tersa (07/07/20), iha rezidénsia Lecidere-Dili.
“Hanesan Komandante PNTL munisípiu foun ha’u hakarak aprezenta-an ba iha amu Bispu ne’ebé mak agora iha Díli, atu nune’e bele hatene no koñese. Ha’u mós uza momentu ida ne’e fahe ha’u nia vizaun no mehi katak, servisu hamutuk atu kria paz no estabilidade iha Díli. Ita foti xavi husi ne’ebá servisu hamutuk, servisu iha ne’e ita involve ona parte barak, igreja hanesan parte ida mak bele apoiu ba iha servisu Polísia nini'an em termus de moral, fiar nini'an atu nune’e ita bele realiza mehi ne’ebé mak ha’u temi paz no estabilidade”, esplika Superintendente Xefe Henrique da Costa.
Iha fatin hanesan, Arsebispu Metropolitana Díli, Dom Virgílio do Carmo da Silva, SDB, hateten, lori Arkidioseze Díli ninia naran agradese ba Komandante PNTL munisípiu Díli, Superintendente Xefe Henrique da Costa.
“Ha’u haree tiha ona iha media, ohin mai iha ne’e mai dada lia uitoan, liu-liu haree Komandante nia mehi no hakarak iha ninia mandatu uma kreda hamutuk ita bele kaer liman servisu hamutuk, hodi hala’o misaun hodi dezenvolvimentu paz no estabilidade iha rai-laran”, dehan Dom Virgílio do Carmo.
Superintendente Xefe Henroque da Costa, simu pose hodi komanda PNTL munisípiu Díli iha loron 1, fulan Jullu, tinan ne’e no Komandante PNTL anteriór Munisípiu Díli, Superintendente Xefe Armando Monteiro komanda fali PNTL munisípiu Baucau. avi
