Komandante Jeral Polísia Nasional Timor-Leste Komisáriu Faustino da Costa, hatete, Grupu Arte Marsiál (GAM) no Grupu Arte Rituál (GAR) ne’ebé seidauk rejista iha Komisaun Reguladóra Arte Marsiais (KRAM).
Informasaun ne’e hato’o hosi Komandante Jerál (KomJer) Polísia Nasionál Timor Leste (PNTL), Komisáriu Faustino da Costa, hafoin remata toma pose ba Komandante Polísia Munisípiu, Komandante Unidade, Xefe Departamentu no Xefe Seksaun sira iha Kuartel Jerál PNTL, Caicoli-Díli, Kuarta (01/07/2020).
Komisáriu PNTL ne’e, hateten, parte Komisaun Reguladóra Arte Marsiais (KRAM) antes ne’e husu ona Grupu Arte Marsiál (GAM) no Grupu Arte Rituál (GAR) ne’ebé seidauk iha legalidade husi Governu, tenke prepara ona dokumentu atu hetan legalidade husi Governu.
Faustino afirma, wainhira GAM no GAR ne’ebé halo movimentu uza atributu, mak parte komandu sei halo atuasaun, tuir lei númeru 05/2017/ lei armas brankas.
“Oinsá mak bele prepara nia dokumentu, klaru ke liu husi kria atividade balun, por ezemplu iha inísiu tinan ne’e Kera Sakti halo ninia kongresu ida, ne’e bele dehan sira prepara ona sira nia estatutu, la’os atu rejistu ne’e atu ema ida ka rua de’it, mabé sira nia responsabilidade ne’e tenke buka malu. Hanesan KomJer atu dehan deit katak, la’os movimentu ho uniforme, ida ne’e mak problema, tanba dalawa’in balu halo movimentu ho atributu arte marsiais nian ne’ebé ke seidauk rejistu, ida ne’e mak labele, entaun saida mak ita halo, ita sei nafatin halo atuasaun”, KomJer PNTL ne’e.
Relasiona ho situasaun Estadu Emerjénsia ne’ebé remata ona, Faustino dehan parte polísia nafatin mantein seguransa iha pontu entrada sira, tanba nasaun viziñu balun sei iha kazu pozitivu ba COVID-19.san
