Sosiedade Timorense no komunidade média oras ne’e dadauk pro-kontra hela ba esbosu lei kriminaliza difamasaun ne’ebé VIII Governu prepara. Tanba ne’e, Primeiru Ministru (PM), Taur Matan Ruak, hateten, labele uza difamasaun hodi insulta no estraga ema seluk nia bom nome no reputasaun iha públiku.
Lia hirak ne’e, hato’o husi Primeiru Ministru Taur Matan Ruak hafoin remata enkontru semanal ho Xefe Estadu Francisco Guterres Lú Olo, iha Palásiu Presidente, Biarro - Pite, Kinta (09/07/2020).
Primeiru Ministru, Taur Matan Ruak, afirma liutan, maske Timor- Leste hanesan nasaun demokrasia, maibé labele uza sala difamasaun hodi trata malu, insulta malu, tolok malu no estraga ema seluk nia reputasaun iha públiku.
“Difamasaun hanorin buat di’ak, dala ruma ita uza sala difamasaun foin nasaun tinan 20 ita uza sala trata ema insulta ema lei mós konstituisaun defende diretu fundamental bom nome nama (baik) maibé ha’u husik ba seida’uk mai konsellu ministru, ita diskuti para haree opiniaun ne’e halo nusa sidadaun sira ne’e halo nusa tanba ita difamasaun husik ema tolok arbiru”, dehan, Xefe Governu, Taur Matan Ruak.
Durante ne’e, Sosiedade Sivíl no mós movimentu univesitáriu Timor-Leste, no komunidade media sira hato’o ona sira-nia lamentasaun kona-ba esbosu lei difamasaun, tanbá konsidera sei hamate liberdade imprensa no liberdade espresaun povu Timor –Leste nian.
Pedidu lei difamasaun ne’e, hato’o husi Ministériu Justisa, maibé seida’uk haruka ba Konsellu Ministru.
Maske nune’e, Xefe Governu hateten, karik lei ne’e haruka ba iha Konsellu Ministru, Governu sei aprova no haruka ba Parlamentu Nasional hodi debate.
Kona-ba esbosu lei kriminaliza difamasaun ne’e hetan pro-kontra husi sosidade sivil, tanba sosiedade sivil haree katak Timor-Leste oras ne’e dadauk lá nesesariu atu adopta lei kriminaliza difamasaun, nune’e sosiedade sivil mos fo ninia pareser katak VIII Governu tenke prioritiza maka lei sibernétika hodi kontrola utulizador media sosial ne’ebé uza hodi tolok malu. Ina
