Diretora Jeral Prestasaun Saúde Ministériu Saúde (MS), Odete da Silva Viegas, hateten, sidadaun 21 kontinua tama ilegalmente iha fronteira teréstre Timor-Leste no Indonézia iha inísiu fulan Jullu.
“Ema ne’ebé tama ilegalmente hamutuk na’in 21, na’in 10 tama husi Memo, na’in 6 tama husi Batugade , na’in 1 tama husi Covalima, no na’in 3 tama husi Tunubibi, entre sira iha sidadaun estranjeiru na’in 1 tama husi Lifau, Oecusse, Parte imigrasaun deporta fila ona,” dehan Odete Viegas da Silva iha Sentru Media Palacio das Cinzas, Segunda (06-07-2020).
Odete esplika Unidade Patrollamentu Fronteira deteta sidadaun sira ne’e tama ilegalmente iha liña fronteira no hala’o hela kuarentena iha fasilidade ne’ebé governu prepara.
Husu ba Komunidade hamutuk ho autoridade lokál sira iha area fronteira nian atu kontrola komunidade sira ne’ebé tama ilegalmente husi rai ketan mai teritóriu Timor-Leste.
Aproveita oportunidade atu informa mós ba populasaun tomak katak, labele tama klandestinamente mai rai ketan Timor-Leste, maibe favór tama tuir dalan legál sira de’it, tamba Governu deside ona atu loke fronteira terrestre semana ida dala ida, iha loron kuarta,durante oras rua nia laran, hahu dia 2 juñu.
Diretora ne’e mós informa Ministériu Saúde preparadu simu ema ne’ebé tama mai rai lalran liu hosi pontu entrada sira maibé tenke priense rekezitu molok desidi ba kuarentena ou auto kuarentena.
“Sidadaun hakarak auto kuarentena sei hato’o pedidu autokarantina no Ministeriu saude liu-husi Ekipa Vijilansia halao kedas follow up ba pedidu ne’e hodi too kedas iha nia uma no hare katak prienxe duni kriteria ba autokarantina, nunee mos kada loron ekipa vijilansia halao follow-up dala rua,” esplika nia.
Durante semana ida nian laran, totál ema ne’ebé be tama husi Pontu de Entrada hotu hanesan Aeroportu, Porto Marítimu no Terrestre hamutuk ema na’in 70.
Husi númeru ne’e, iha ema na’in 27 maka halo autokuarentena no na’in 43 tama hotu iha konfinamentu obrigatóriu ne’ebé governu prepara.
Tuir dadus husi Ministériu Saúde dadaun ne’e totál ema iha fatin kuarentena hamutuk 100 resin no sira ne’ebé hala’o auto kuarentena hamutuk 90 resin.
Husu ba komunidade hotu atu mantein halo prevensaun ba covid-19 liuhusi: uza maskara, distansia fíziku, fase liman bebeik ho sabaun, evita halibur malu iha grupu ne’ebé envolve ema barak. ida
