Unidade Polísa Marítima labele asegura ró modelu ai ho bandeira Indonézia ne’ebé mak terdampar illa Asirara Jaco, munisípiu Lautem, tanba ró laran rai henek tama no mákina avaria ona.
Komandante Unidade Polísia Marítima, Superintendente Basílio de Jesus, iha Tersa (30/06/20) desloka ba Illa Jaco ró lansa PNTL hamutuk membru sira atu ba asegura ró ai Indonézia ne’ebé mak anin tasi baku mai tasi ninin iha área Asirara Jaco fulan Juñu tinan ne’e.
Maibé depois Komandante Basílio ho membru to'o iha fatin ró terdampar hodi haree rasik ró nia kondisaun, maibé ró ne’e ladiak ona, tanba makina avária tanba rai henek tama ona iha ró nia laran.
“Akontese ne’ebé mak akontese iha loron 12, fulan Juñu, liu ba kuaze ema estránjeiru na’in 13 ho ida terdampar iha illa Jaco kostera Timor-Leste. Agora prosesu ne’e tama ona iha prosesu judisiál, entaun iha loron 22, fulan Juñu, sua exelénsia Komandante Jerál PNTL Komisáriu Faustino da Costa, hasai despáisu ida ba Komandante UPM ho hanoin katak, atu dada ró ida ne’e ba Com. Bainhira ha’u atu fó ordem ba ekipa ho Ró Kay Rala Xanana atu mai dada ró ne’e, ha’u mai haree ho matan iha ka lae posibilidade atu dada ró ida ne’e, ha’u haree rasik difisil tebes, tanba makina avária tanba rai henek tama iha laran”, esplika Komandante UPM Superintendente Basílio de Jesus, ba GMN iha área Asirara, illa Jaco.
Basílio de Jesus akresenta, nia parte sei relata mós ba Komandante Jerál PNTL Komisáriu Faustino da Costa katak, ró ne’e labele asegura ona mai iha portu Com-Lautem.
Sidadaun estranjéiru na’in 13 ne’ebé mak terdampar iha illa Jaco, kompostu husi sidadaun Indonézia na’in 2 no sidadaun Vietname na’in 11.
Sidadaun sira ne’e, submete ona ba prosesu investigasaun no asegura iha kuarentena durante loron 14, hodi prevene COVID-19 labele hadaet ba Timor oan sira.
Tuir informasaun Polísia antes ne’e relata, ró ai ne’e terdampar iha iha Illa Jaco, tanba kombustivel ne’ebé mak ró ne’e uza hotu ona. avi
