Membru FALINTIL-Forsa Defeza Timor-Leste no Polísia Nasionál Timor-Leste (PNTL) kaptura membru Grupu Arte Marsiál (GAM) balun ne’ebé tama ilegál liu husi fronteira ba hasa’e sintu iha Indonézia.
Maske Timor-Leste, iha hela situasaun Estadu Emerjénsia, hodi halo prevénsaun ba covid-19 no variante Delta, maibé Timoroan balun kontinua kontra regras estadu emerjensia, hodi hakat liu fronteira ho ilegalmente ba iha Indonézia.
Komandante PNTL Munisípiu Bobonaro, Superintendente Antónino Mauluta hatete iha semana ne’e, membru F-FDTL husi Unidade Polísia Militár, ho PNTL Munisípiu Bobonaro konsege kaptura ema na’in haat mane tolu no feto ida, hodi submete ba prosesu investigasaun. Suspeitu na’in hat ne’e ho inisiál ES, ABS, VMNN, no MC
“Ema sira nia objetivu ne’e atu ba hasae sabuk. Tanba tuir deklarasaun husi ema na’in hat ne’e, señora ida ho nia laen mak organiza, sira mak hanesan mata dalan lori sira ba iha Indonézia, señora ne’e depois kaptura sira ne’e kaben bosok dehan atu ba soe foer, maibé nia halai lakon tiha ne’ebé dadauk ita sei buka tuir, kazu ne’e ita refere ona ba komando munisípiu Díli”,esplika Komandante PNTL Munisípiu Bobonaro, Superintendente Antónino Mauluta, ba GMN Kinta (08/07/2021), iha Batugade.
Dadaun ne’e, PNTL Munisípiu Bobonaro kontinua hala’o operasaun, hodi aplika regras regurozu ba ema sira ne’ebe sai no tama ilegál iha fronteira, nudar parte ida ba prevensaun moras husi coronavirus foun.avi
