Grupu Movimentu Juventude Choque Bekora (GMJCB), deskonfia Polísia Sientífika Investigasaun Kriminál (PSIK) halo sabotajen ba prosesu kazu asidente tráfegu hamate vitíma Reinato Viera de Araújo iha Kuluhun.
Porta- Voz Grupu Movimentu Juventude Choque, João Luciano Galhos, hateten, tuir loloos PSIK tenke detein suspeitu durante oras 72, iha sela detensaun, tanba iha momentu ne’ebá krime seidauk liu tempu oras 24.
João Luciano Galhos, dehan, iha artigu 2 númeru 2 letra K , husi dekreta lei númeru 9/2009 de fevereiru lei organika PNTL hateten katak, kompetensia para garantir lei no seguransa rodoviáriu kompetensia PNTL ninian. Iha artigu 6 husi dekretu lei númeru 15/2014 de Maiu , lei organika PSIK , la fó biban ba kompetÉnsia PSIK hodi organiza ou prosesu kazu natureza asidente tráfegu. No iha artigu 219 númeru 1 husi kódigu prosesu penál, koalia kona-ba flagragrante delitu.
“Tuir loloos PSIK detein suspeitu iha momentu ne’ebá, tanba krime refere foin mak akonteses no seidauk to’o tempu 24 horas. Maibé realidade hatudu katak, PSIK la obdese no la kumpri ordem husi artigu refere. Nune’e ami Grupu Movimentu Juventude Choque Bekora deskonfia katak, PSIK halo sabotajen ou konspirasaun ba prosesu refere. No abuzu kompetensia ne’ebé Ministériu Públiku delega ba PSIK liu husi artigu 48 kódigu prosesu penál”,esplika Porta- Voz Grupu Movimentu Juventude Choque, João Luciano Galhos, ba jornalista sira liu husi konferénsia imprensa Kuarta (14/07/2021) iha Aldeia Au-Hun Suku Bekora.
Iha fatin hanesan, José de Araújo Chang, membru Grupu Movimentu Juventude Choque Bekora, hateten, tuir lolos, PSIK entrega kazu asidente tráfegu ne’e ba iha PNTL atu loke prosesu investigasaun, la merese, atende kazu refere.
“Kazu ne’e asidente tráfegu loloos ne’e kompetensia Tránzitu nian mak tuun iha terrenu hodi hare’e nia kronolojia akontesimentu, akontese iha ne’ebé lori kareta nia posizasaun iha ne’ebé, vítima hamrik no la’o iha ne’ebé, entaun nia mak halo relatóriu ba asidente ne’e mak nia halo prosesu ba oin. Agora PSIK mak halo fali investigasaun ida ne’e mak sai ami nia lamentasaun diskontente, karik ami deskonfia keta akontese tiha ona buat ruma iha ne’ebá”,dehan José de Araújo Chang.
Prezidente Grupu Movimentu Juventude Choque Bekora, João da Silva, husu ba suspeitu atu responsabiliza ba aktu asidente tráfegu ne’ebé komete no responsabiliza família vítima nia oan sira.
“Ami husu ba suspeitu atu responsabiliza ba aktu krime ne’ebé mak nia komete hodi tama kadeia no responsabiliza família nia oan sira. Ba oin jornalista sira akompañha prosesu ne’e la’o ba oin. Imi hotu hatene hakerek iha imi nia livru grupu ida Choque ne’e grupu ida beik tein iha prosesu rejisténsia, maibé tanba asaun ne’e iha ukun a’an ami hakruk, lolos nia uma nia família ami despaisa hotu, maibé ami kalma nonok para bele la’o tuir prosesu”, João da Silva.
Xefe Investigadór PSIK, Octávio da Costa Araújo, hateten, kazu asidente tráfegu envolve supeitu rejista ona iha Ministériu Públiku, hein delegasaun kompetensia husi Ministériu Públiku atu delega kazu ne’e ba iha Tránzitu ka PSIK.
“Relasiona ho kazu ida ne’e ami tuir norma prosesual, ami halo hotu prosesu ona rejistadu ona iha Ministériu Públiku. Kuandu hamate ona ema ida nia vida ne’e homesidu, ami simu ona prosesu ne’e imediata ami haruka ba Ministériu Públiku, agora kompetensia Ministériu Públiku ninian mak atu delega ba se, mas iha prosesu inisiál, depois mak Ministériu Públiku delega kazu ne’e ba iha PSIK ka ba Tránzitu”,dehan Octávio da Costa Araújo.
Kazu asidente tráfegu ne’e akontese iha loron 23 fulan Juñhu, mais ou menus tuku lima madrugada oras Timor-Leste iha estrada Kuluhun, wainhira vítima Reinato Viera de Araújo, hala’o hela ezersisiu la’o ain iha estrada ninin.avi
