Governu liu husi Vise Ministru Interiór (VMI), António Armindo, lansa taka stiker ba kareta sapa matríkula DH Indonézia nian ne’ebé mak tama mai iha Timor-Leste.
Iha Kuarta (07/07/2021), Komando Jerál PNTL koloka membru Tránzitu iha Postu Integradu Motain no lansa taka stiker ba kareta sira husi NTT-Indonézia, wainhira atu halo sirkulasaun iha teritóriu Timor-Leste. Stiker ne’e ho nia logo PNTL no Ministériu interior.
“Polísia Tránzitu ne’ebé mak ita destaka iha fronteira tenke servisu ho integridade hatudu imi nia profesionalismu iha servisu atendementu iha públiku ne’ebé diak atu evita kobransa tuir ita bo’ot sira nia hakarak. Tanba ne’e tenki kolobora diak ho Dirésaun Nasionál Transporte Terreste (DNTT) no instituisaun hotu ne’ebé mak destaka hotu iha fronteira”,esplika Vise Ministru Interiór António Armindo, liu husi diskursu, iha seremonia destaka membru PNTL iha Postu Integradu Mota-Ain.
Komandante Jerál PNTL Komisáriu Faustino da Costa, agradese ba Ministériu Finansa ne’ebé prepara fatin servisu ba membru Tránzitu, hodi hala’o kna’ar iha postu integradu Mota-Ain.
“Komesa ohin ba oin ne’e sira hala’o ona servisu iha ne’e, dala ida tan ita hahú uluk iha Mota-Ain Batugade ninian hanesan mós ba Salele Mota-Masin, depois Mota-Masin mós ita koloka kedas emidiatu, atu dehan katak, implementasaun ohin ita hala’o ne’e liu husi ko’ordenasaun lubuk ida mak ita hala’o preparasaun. PNTL ko’ordena ho Ministériu Finansas hodi produs stiker hodi fó ba kareta na’in no fó ba PNTL ne’e produs husi Ministériu Finansas, ko’ordenasaun seluk mak prepara fatin, Ministériu Finansas mak fó fatin ba ita , seluk fali mak ita halo koordenasaun ho parte DNTT, ita mós sensevilzia ida ne’e ba iha Embaixada Indonézia nian para hatene nia regras ne’e. Hanesan ohin ita komesa lansa taka stiker ba kareta rua. Husi koor stiker membru sira hatene ona, tanba ita halo ona formasaun ba sira, se koor kinur karik nia ba iha ne’ebé no koor azul”,dehan Faustino da Costa.
Xefe Departementu Tránzitu No Segurasan Rodoviário Nasionál Superintendente João Belo dos Reis hatete, stiker ne’ebé taka ba kareta sira ho folin ne’ebe diferente hanesan stiker ba kareta boot ho folin $ 3no ba kareta ki’ik ho deit $ 2
“Ohin ba ohin kareta estránzeiru tama tritóriu Timor nia tenke kumpri didiak ita nia kódigu estrada iha ita nia estrada públiku. Nia tenke fó kontribuisaun tasa tuir loron ne’ebé nia hela iha ne’e. Terseru document ne’ebé mak sira lori sei rai hotu iha postu integradu, ita mak sei fó plata nomor, hanesan ohin stiker ne’e. Bainhira ita prega stiker ne’e ba sira nia kareta iha tempu ne’ebá sapa matríkula Timor mak ida ne’e”,dehan João Belo dos Reis.
Tuir planu, Komando PNTL mós sei koloka tan membru Tránzitu iha fronteira Sakato no fronteira Oesilo.avi
