Polísia Nasionál Servisu Investigasaun Kriminál (PNSIK), loke ona prosesu identifikasaun ba ema na’in 10, ne’ebé deskonfia envolve iha kazu oho vítima Fitalício Soares iha Delta III.
“Iha ema na’in 10, mak ita halo identifikasaun, maibé iha na’in tolu mak ita rekomenda Ministru Públiku”,esplika Komandante PNSIK Superintendente Xefe José Neto Mouk, ba GMN, Segunda (12/07/2021) via telefone.
Alende ne’e, Zeferina Marcela da Silva, núdar kost na’in hateten, durante fulan tolu ona vítima Fitalício Soares, aluga uma iha Delta III hodi hela, no vítima rasik la mete problema ruma, maibé iha Sábadu (10/07/2021) derepente akontese ema duni malu iha estrada área Delta ninian, bainhira Zeferina hadér haree vítima Fitalício monu latan hela ba iha rai no ran sulin maka’as.
Hafoin akontese tiha kazu ne’e, komunidade liga ambulánsia transporta ba iha Sentru Saúde Komoro, maibe la konsege salva.
“Akontese ida iha dia 10 ami toba dukur, mais ou menus tuku 10 ba leten ema duni malu, barullu iha estrada dehan oho tiha-oho tiha, entaun ami mós trauma no sai hotu halai sai ba estrada hodi haree no ema duni malu Elemloi to’o Rotunda nian, maibé la konsege kaer, entaun sira fila ida-idak fila ba uma, depois viziñu sira mós fila idak-idak toba ona, depois la to’o oras ida ha’u rona ema baku tarutu iha ha’u-nia uma oin, depois ha’u-nia alin ida iha uma sorin hakilar ema baku Fitalício, depois ha’u halai sai ba haree Fitalício latan hela iha estrada mós, ema ida baku ne’e ha’u nunka hetan”,dehan Zeferina Marcela da Silva.
Iha parte seluk, Diogo Ferreira, husu ba PNTL atu buka no kaptura hotu suspeitu ne’ebé mak envolve iha aktu krime hodi hamate sira-nia alin mane.
“Ami lakon ami-nia ema ida iha ami-nia le’et, tanba la’ós Maromak mak hakotu ninia moris, maibé nia maluk umanu mak hakotu nia vida, ami simu realidade ida ne’e, ami simu ho matan-been. Ami rekomenda ba Governu, liu-liu ba instituisaun seguransa, ami nafatin tau esperansa ba instituisaun PNTL atu buka tuir ema kriminozu hanesan ne’e, ne’ebé hakarak loron-loron tuur para habadak ema nia vida”,dehan Diogo Ferreira.
Tuir planu, família sei transporta Fitalício nia mate-isin ba Munisípiu Lautem hodi hala’o seremonia fúnebre.avi
