Adjuntu Komisáriu Komisaun Anti Korrupsaun (KAK), Luis de Oliveira Sampaio, hatete, KAK laiha kompeténsia máximu investiga kazu sira ho natureza korrupsaun, tanba lejislasaun sira ne’ebé Parlamentu Nasionál (PN) aprova, limite KAK atu halo investigasaun kle’an.
Adjuntu Komisáriu KAK ba Asuntu Prevensaun no Sensibilizasaun, Luis de Oliveira Sampaio, hateten, preokupasaun sosiedade sira nian, dala-barak kestiona instituisaun independente ne’e la agresivu atu kombate korrupsaun.
Nia dehan, tuir lei, KAK nia ezisténsia atu prevene no kombate korrupsaun, maibé iha implementasaun servisu, sempre hasoru dezafiu sira no iha limitasaun sira kona-ba prosesu investigasaun. Tanba prosesu balun, KAK tenke hein delegasaun kompeténsia husi Ministériu Públiku, mezmu kazu ne’e fó prejuízu bo’ot ba Estadu.
“Afinál iha lei ne’e, limite kompeténsia, komisaun la goja kompeténsia absoluta iha nível servisu investigasaun nian, hanesan ohin iha diskusaun ne’e katak, ami nia knaar ne’e to’o deit uainhira ami submete ona relatóriu notísia ne’ebé bolu auto partisipasaun, ami hein fali autorizasaun ka delegasaun husi Ministériu Públiku, atu halo saida? Bainhira laiha delegasaun, bainhira la halo autorizasaun, ami labele halo tan buat seluk, relasiona ho kazu ne’ebé ami aprezenta ka kazu ne’ebé mak delega, tanba kuandu ami atua liuhosi kbiit ne’ebé lei fó, bele konsidera hanesan abuzu poder”,Adjuntu KAK hato’o asuntu ne’e, hafoin reuniaun ho sosiedade sivíl, kona-ba papel KAK nian, iha salaun FONGTIL, Caicoli, Díli, Tersa (13/07).
Diretór Ezekutivu FONGTIL, Daniel dos Santos Carmo, informa, liuhosi diskusaun ne’e, sosiedade sivíl bele hatene diak liu, kompeténsia loloos KAK nian, tuir lei no oinsa kombate korrupsaun.
ONG forum ne’e mós husu, parlamentu atu hadi’a fali lei sira kona-ba kombate korrupsaun nian, atu fó kbiit tomak ba KAK hodi hala’o sira-nia servisu ho di’ak.
“Se ita hakarak KAK ne’e hanesan saida mak espetasaun públiku nian katak, KAK tenke iha nehan, entaun ita ezije ba Parlamentu Nasionál atu hadia lei sira, atu fó kompeténsia boot liu ba KAK, liu-liu prosesu investigasaun sira”,informa Diretór FONGTIL.
Daniel akresenta, órgaun lejisladór sira uainhira harii instituisaun independente ida atu kombate krimininalidade, liu-liu ba korrupsaun, tenke halo lei ne’ebé fó kbiit tomak ba instituisaun hodi ezekuta.
Tuir lei númeru 08/2009 lei kona-ba KAK, iha artigu 05, númeru 02 hateten, iha matéria investigasaun kriminal nian, uainhira realiza inkéritu ka partisipa iha aktu inkéritu, tenke hetan delegasaun husi Ministériu Públiku.San
