GMN TV Justica e Segurança Polémika ró Tranship II, MTK José Agostinho halai ses husi jornalista

Polémika ró Tranship II, MTK José Agostinho halai ses husi jornalista

Ministru Transporte Komunikasaun (MTK), José Agostinho da Silva, halai ses husi jornalista hodi lakohi fó komentáriu relasiona ho prezensa ró Tranship II Gresik iha Portu Díli, ne’ebé sai polémika iha públiku, liu-liu sosiedade sivíl, no membru Parlamentu Nasionál, kestiona prosesu administrativu transporte marítima ne’e deskonfia iha indísiu krime, no mós kondisaun la viavel atu tula pasajeiru.

Iha parte prosesu administrativu nian, antes ne’e Komisaun Anti Korrupsaun (KAK) nia akompañamentu inspesaun ne’ebé Diresaun Nasionál Transporte Marítima (DNTM) hala’o, identifikasaun prosesu ne’e viola regulamentu sira kona-ba lei aprovizionamentu. No mós dokumentu Ró nian, kona-ba data manutensaun iha fulan Jullu, tinan ne’e inválidu ona.

Tuir lei númeru 10/2005 Regime Jurídiku Aprovizionamentu, iha artigu 38, númeru 2 kona-ba Konkursu Públiku Nasionál hatúr, uainhira iha akizisaun ne’ebé relasaun ho matérial, obra no servisu ho nia valor osan USD 100.000, maka konkursu ne’e obrigatóriamente iha nasionál.

Defaktu, ró ne’e kontrata fulan tolu, kada fulan ho montante USD 220.000, signifika, durante fulan tolu ne’e governu sei halo pagamentu ba operasaun Ró ho total USD 660.000.

Diretór Nasionál Transporte Marítima, Lino Barreto, antes ne’e mos rekoñese, prosesu ne’e la liu husi tenderizasaun no laiha konkursu públiku, maibé ajudikasaun direta.

“Ha’u hanoin kona-ba ajudikasaun direta ne’e memang loos duni, tanba laiha komparativu, tanba ró ne’e mai deit”,dehan Lino Barreto, hafoin partisipa iha programa Grande Entrevista, iha estúdio GMN-TV, Bebora, Díli (18/06).

Mezmu transporte marítima ne’e to’o ohin loron kontinua sirkula ba Ataúro, Oecusse no Díli, maibé prosesu atu atraka iha portu, sempre hasoru problema, tanba kondisaun la diak.

Preokupasaun sira ne’e hotu, Jornalista la’o tuir MTK, José Agustinho da Silva, hodi husu pozisaun Ministru nian, atu suspende operasaun ró ne’e, maibé governante ne’e ho nia eskoltu, halai lalais ba nia karreta no lakohi fó komentáriu.

“Ha’u laiha komentáriu”,hateten José Agustinho da Silva, uainhira marka prezensa iha aniversáriu Komisaun Funsaun Públiku nian ba dala-7, iha salaun CNE Colmera, Díli.

KAK submete tiha ona auto partisipasaun ba Ministériu Públiku kona-ba rejultadu investigasaun, no deskobrimentu sira relasiona ho irregularidade no prosesu administrativu ró Tranship II nian.San


Banner

Foto

Notisia Ikus

Variante Delta nafatin ameasa saúde públika, PR dekreta EE da-XVI

July 31, 2021
Xefe Estadu, Francisco Guterres Lú Olo, liu hos...

Velosidade internet lentu, AHDMTL husu MTK tau atensaun

July 31, 2021
Velosidade internet lentu ka neneik liu difikult...

Envolvimentu juventude iha ParPol importante

July 31, 2021
Envolvimentu  juventude iha aktividade Partidu ...

LH kestiona PN la envolve sosiedade sivíl iha diskusaun lei EOJF

July 31, 2021
Koordenadór La’o Hamutuk (LH), Celestino Gusm...

Governu aplika KO iha Ermera

July 31, 2021
Governu aplika ona Konfinamentu Obrigatóriu (KO...
1 2 3 623

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker