Komisaun Anti Korrupsaun (KAK) submete tiha ona auto partisipasaun, kona-ba rezultadu investigasaun no deskobrimentu sira relasiona ho irregularidade no prosesu administrativu ró Tranship II nian ba Ministériu Públiku (MP) iha fulan Juñu nia laran, tinan ne’e.
Adjuntu KAK ba Asuntu Prevensaun no Sensibilizasaun, Luís Oliveira Sampaio, hateten, auto partisipasaun ne’e atu MP konsidera iha ka lae, indísiu krime, hafoin delega kompeténsia atu ezekuta, tuir kompeténsia KAK nian ne’ebé lei atribui.
Tanba tuir adjuntu KAK, lei númeru 8/2009 limite mos kompeténsia KAK nian balun, liu-liu kona-ba kazu korrupsaun sira.
“Ita submete ona auto partisipasaun ba Ministériu Públiku, atu haree hosi notísia krime no informasaun sira ne’ebé ita konsidera iha indísius krime nian, aprezenta ba Ministériu Públiku hanesan na’in ba prosesu penál tomak”,hateten Adjuntu KAK, ba GMN iha nia knaar fatin Praia dos Coqueiros, Díli (12/06).
No tuir prosesu normal, KAK labele kontinua ba prosesu seluk, relasiona ho Ró Tranship II nian, tanba hein deit delegasaun MP nian.
“Infelizmente to’o agora ita seidauk hetan fali resposta ka autorizasaun ou delegasaun husi Ministériu Públiku. Prátikamente iha opsaun rua, ida Ministériu Públiku bele kaer rasik, bele mos delega ba autoridade polisiál ba kazu ne’e, hanesan Komisaun Anti Korrupsaun” dehan Luis Oliveira.
Adjuntu KAK nia deklarasaun ne’e, diferente ho Prokuradór Jerál Repúblika nian, tanba foin lalais ne’e, Alfonso Lopes hateten, MP seidauk simu prosesu ruma husi KAK, kona-ba Ró Tranship II.
“Seidauk tama, ne’e la’o nafatin” konfirma PJR, Alfonso Lopes, uainhira hasoru malu ho Prezidente Repúblika Francisco Guterres Lu Ólo (06/07).
Kona-ba Ró Tranship II atraka tarde iha portu sira iha Díli, Ataúro no Oecusse, KAK konsidera ne’e hatudu indisiu forte katak, téknikamente Ró ne’e kondisaun la diak.
“Hanesan bai-bain ita haree dala-barak ona, se ró ne’e halo viajen, halo operasaun atu ba fatin ida problema, atu atraka problema, mai fali atu atraka problema, ne’e hatudu indisiu katak, ró ne’e iha duni problema” subliña nia.
Instituisaun independente ne’e mos informa ona deskobrimentu sira kona-ba Ró Tranship II nian, ba Ministériu Transporte Komunikasaun, no Ministru rasik aseita ho deskobrimentu sira ne’e.
Iha Fulan Juñu ne’e, Ró Tranship II tula Primeiru Ministru Taur Matan Ruak ho membru governu balun, partisipa iha seremónia inaugurasaun Postu UPM iha Ataúro, maibé difisil atraka iha Portu Beloi.
Nune’e mós iha Sábadu ne’e, Ró refere fila husi Oecusse, maibé nafatin atraka ladiak iha portu Díli, nune’e pasajeiru sira tun deit husi eskada alternativa.
Ró ne’e, governu aluga ho montante osan USD 220.000 kada fulan, no governu liuhosi MTK kontrata Durante fulan 3, ho nia viajen semana ida dala ida, Díli Ataúro no Díli Oecusse.San
