Komandante Polísia Tránzitu Munisípiu Díli Inspetór Domingos Sarmento Gama, lamenta ho advogadu Pedro Aparício, ne’ebé impede nia kliente fó deklarasaun ba Polísia, relasiona asidente tráfegu hamate vítima Reinato Viera Araújo iha Kuluhun foin lalais ne’e.
“Pedro Aparício ho nia kliente LPA mai to’o iha ami nia fatin sira rasik la koalia buat ruma, nia advogado rasik señor Aparisio hanesan nia la autóriza, nia husu para labele fó imformasaun katak, ninia kliente simu ona TIR, ami nia parte kazu ne’e seidauk haruka ba iha Ministériu Públiku querdezer seidauk iha prosesu ne’e ba nia kliente núdar suspeitu. Ne’ebé ami dever hanesan Tránzitu ami hala’o ami nia kna’ar, hanesan Polísia Tránzitu hodi kompleta kazu ne’e lori ba Ministériu Públiku, depois mak Ministériu Públiku delega fali kompeténsia. Nia atu delega ba PSIK ka delega ba iha Polísia Tránzitu, asaun penál ne’e Ministériu Públiku nia na’in. Mas advogado dehan ami Polísia Tránzitu la komprende lei ou liu-liu dehan la hatene kodigui prosesu penál ha’u hanoin ida ne’e lalos” ,esplika Komandante Tránzitu Munisípiu Díli Inspetór Domingos Sarmento ba GMN Sábadu (10/07/2021), iha Kaikoli, Díli.
Responde ba kestaun ne’e, Advogado Privadu Pedro Apáricio, rejeita deklarasaun Komandante Tránzitu Domingos Sarmento ne’ebé mak hateten, Pedro Aparício bandu nia kliente fó informasaun ba iha Tránzitu.
Pedro Aparício hateten, nia kliente sai ona arguidu ba kazu asidente tráfegu iha Kuluhun, no kazu ne’e rasik Polísia Siéntifika Investigasaun Kriminál (PSIK) aplika ona medida koasaun Termu identidade Rezidénsia, hodi hein delegasaun kompeténsia mai hodi aprezenta ba iha Tribunál.
“Ha’u la halo impedementu, tanba saida tanba prosesu hotu- autos hotu-hotu agora iha Ministériu Públiku. Ministériu Públiku tuir artigu 57 kodigu prosesu penál, nia iha kompeténsia nia rasik bele deriji investigasaun ou nia bele delega nia kompeténsia ne’e ba iha PSIK ka ba iha Servisu Investigasaun Kriminál PNTL ninian. Informasaun ne’ebé mak Polísia fó ba ami ne’e atu halo mediasaun ida tanba prosesu kriminal ne’e nafatin la’o, maibé ba kestaun humanidade tanba ne’e asidente tanba ne’e entaun ami hanoin Polísia atu fasilita atu halo dialogu ida, entré família arguidu ho vítima, maibé to’o iha ne’ebá la halo ida ne’e. Polísia so bolu de’it arguido ba depois vítima nia família koñhese tiha depois familia vítima fila tiha, arguido hela atu halo investigasaun, tanba ida ne’e mak ha’u hateten Polísia Tránzitu laiha kompeténsia ida halo investigasaun, asaun hotu-hotu ne’e na’in mak Ministériu Públiku, Ministériu Públiku sei delega ba se. Iha ne’e falta konhesimentu kodigu prosesu penál husi Tránzitu, tanba sira hatene de’it mak kodigu estrada nian”,dehan Pedro Aparício.
Kazu asidente trafegu ne’e akontese iha loron 23 fulan Juñu tinan ne’e, ne’ebé mak involve suspeitu ho inisiál LPA deskonfia soke mate vitima Reinato Viera de Araújo.avi
