Polísia Nasional Servisu Investigasaun Kriminal (PNSIK), Kinta (29/8/18), ezekuta mandadu detensaun Tribunal Distrital Díli ho númeru NUC/0086/ 18, kaptura suspeitu fen ho laen ho inisial AU ho MM hodi detein iha sela detensaun Munisípiu Díli durante oras 72 hodi subemete ba primeiru interogatoriu.
Suspeitu nain rua deskonfia involve iha kazu insestu ne’ebé deskonfia aman halo abuzu seksual hasoru nia oan hakiak, maibe oan kesar ba nia inan hakiak, maibe inan hakiak la preokupa ho vítima CCU.
PNTL kaptura uluk suspeitu MM iha nia rezidensia área Elemloi, Munisípiu Díli, no suspeitu AU kaptura iha Hospital Nasionál Guido Valadares (HNGV) hodi detein iha sela detensaun Munisípiu Díli.
Mandadu detensaun Tribunal Distrital Díli ne´e mak haruka halo detensaun suspeitu AU nu’udar suspeitu ne´ebé sei investiga tanba halo krimi abuzu seksual ba vítima husi artigu 177 kódigu penal hafoin halo detensaun aprezenta ba Juis hodi halo primeiru interogatoriu.
Bainhira halo detensaun ténki aprezenta orijinal nian ba vizadu katak, oras loron detensaun nian ténki hatebes katak, detensaun komunika kedas ba Juis.
Tuir dadus balun GMN rekolla iha terrenu katak, kazu abuzu seksual involve AU hasoru nia oan feto hakiak akontese ba dala rua, iha tinan 2017 no iha tinan 2018.
Tanba ne´e iha fulan Maiu, tinan 2018, vizita illas Nain Feto tama iha suspeitu AU ho MM ninia rezidensia iha área Elemloi hafoin vítima CCU aproveita situasaun kontaktu ba ninia bin naran Juliana hodi hato´o keisa ba PNSIK nune´e to´o ikus PNSIK promove kazu ne´e ba Tribunal Distrital Díli, hodi hasai mandadu detensaun ba suspeitu nain rua nu’udar Fen ho laen.
Enkuantu vítima CCU agora dadauk asegura ona iha uma mahon Police Vulneravel Unit.avi
