Komandante Jeral PNTL Komisariu Julio Hornay, dezarma ajenti PNTL ho inisial AS, tanba deskonfia lori pistola ameasa sarani Katólika sira wainhira retiru iha Kapela Bidau, Mota-Klaran, Díli.
Kazu ne´e akontese iha Suku Bidau Santana, Postu Administrativu Cristo-Rei, Munsípiu Díli, Domingu (05/08/18), mais ou menus tuku 06 kalan oras Timor-Leste.
``Horseik (Horbairuak) ha´u haruka ba kaptura sira to´o tiha iha fatin Kapela Bidau Mota-Klaran nia halai ohin (Horseik) dadersan ha´u haruka nia komandante haruka nia mai aprezenta iha ne´e, ha´u bolu seksaun Justisa PNTL foti kedas nia arma hodi submete ba prosesu investigasaun, ne´e lalika halimar demais, ita nu’udar autoridade seguransa hala´o ita-nia misaun ho klaru la´os fora husi servisu ameasa tun sa’e,``esplika Komandante Jeral PNTL Komisariu Julio Hornay, ba jornalista sira Segunda (06/08/18) iha Kuartel Jeral PNTL Díli.
Amadeu Ribeiro, koordenadór husi grupu karismátiku espírito santo, maske la asiste diretamente akontesimentu ne´e, maibé koñese ona problema ne´e.
``Ami husi Becora mai iha kapela Bidau haree ema halai hotu ona tanba tauk membru Polísia tiru, ha´u mós hakfodak wainhira rona ema konta Polísia tiru. Ne´e mak ha´u husu ba kolega sira brani koalia lia los labele tauk nia atu Polísia, Igreja la´os atu lori pistola ba tama igreja laran, tanba iha Igreja ema buka paz hodi halo retiru ne´e,``dehan Amadeu Ribeiro.
Oras ne’e dadauk, grupu karismátiku mós prepara ona relatóriu husi akontesimentu ne´e, hodi entrega ba parókia segrado coração de jesus Becora.avi
