Mate isin feto ida ne´ebé deskonfia ema oho soe iha área Subaun Munisípiu Manatuto, rai ona iha Hospital Nacional Guido Valadares (HNGV), maibe to´o ohin loron família seidauk hatene hodi rekoñese.
Mate isin ne´e hetan husi komunidade iha loron Sabadu (18/08/18) iha Subaun Munisípiu Manatuto, no komunidade sira informa kedas ba iha Komando PNTL Munsípiu Manatuto hodi kontaktu mai iha Polísia Forensik hodi foti mate isin iha tasi ibun. Evidensia ne´ebé mak Polísia hetan mak hanesan ropa, sinelus no pasta.
``To’o agora seidauk iha família ruma mak mai iha hato’o mai ami Polísia dehan, nia ema lakon,``esplika Komandante Sub Xefe Servisu Investigasaun Kriminal Inspetor Xefe Polísia, Mouzinho Correia, ba GMN Tersa (21/08/18) iha edifisiu Forensik Kuartel Jeral PNTL, Díli.
Enkuantu kona-ba motivu husi akontesimentu parte Polísia sei dezenvolve hela.
``Tanba ne´e mak ha´u haruka ekipa ida halo investigasaun kona-ba kazu ida ne´e. Prosesu identifikasaun foin mak hahú Tersa (21/08/18) espera katak iha loron hirak nia laran ita sei iha informasaun balun kona-ba matebian ninia identidade. Iha ne´eba mós iha evidensia balun hanesan ropa no sinelus bele ajuda ita hodi identifika matebian ne´e,``dehan Mouzinho Correia
Mate isin sei rai hela iha mortuariu seidauk halo autopsia, maibe pedidu servisu Investigasaun Kriminal hato´o tiha ona ba Ministériu Públiku hodi hasai desizaun autopsia.avi
