Ro Falintil-Forsa Defeza Timor-Leste (F-FDTL) ho naran Jaco avaria komesa tinan 2016 to´o agora seidauk hetan manutensaun, tamba ne’e labele halo operasaun.
Ro Jaco F-FDTL nian durante tinan 2016 to’o agora tama ona ba fulan Agostu, tinan 2018, para de´it iha kais Komponente Naval labele halo operasaun, tanba pesa balun a´at. Parte lideransa sira husi Komponente Naval hato´o ona ba Governu, atu sosa pesa foun troka pesa ne´ebé mak a´at, maibe to´o ohin loron seidauk.
``Kondisaun diak ida ladiak, maibe ami halo ona relatóriu iha tinan kotuk avaria oituan, mas iha rekomendasaun pesa seidauk mai, ida fali diak labele navegador, emerjensia ami bele ba maibe labele ba dook, tanba Ro nia pesa balun ladun kondisiona para la’o navegador,``Komandante Komponente Forsa Naval Ligeira Kapitaun Tanente João Fátima `Buka-Rasik` ba GMN, Segunda (27/08/18), iha Kuartel komponente Naval Hera.
Ro Jaco no Betano Governu Timor-Leste, sosa husi nasaun China, ho ekipamentu funu kompletu no Ro ne’e mai Díli, Timor-Leste iha tinan 2010.
Ro F-FDTL labele halo operasaun
Nune’e mos, Ro Falintil-Forsa Defeza Timor-Leste (F-FDTL), hamutuk 6 agora dadauk para de´it iha Kais Komponente Naval Hera, tanba kombustivel laiha.
``Kombustivel em jeral agora laiha, mas kombustivel iha mak oituan de´it hodi la´o oras rua de´it, liu oras tolu labele. Ami mós halo Ro moris de´it iha kais Hera,``Komandante Komponente Forsa Naval Ligeira Kapitaun Tanente João Fatima ` Buka-Rasik` ba GMN Segunda (27/08/18) iha Kuartel komponente Naval Hera.
João Fatima `Buka-Rasik` dehan, hasa’e ona proposta ba Xefe Estadu Maior Jeneral hodi bele hato’o ba Governu hodi bele rezolve kombustivel ba iha Komponente Naval, atu nune´e Komponente Naval bele hala´o operasaun hodi kombate peska ilegal.
Entretantu Ro F-FDTL agora hamutuk 6 kompostu husi Ro Oecusse no Atauro apoiu iha tinan 2000 no Ro Jaco no Betano ne´ebé mak Governu sosa iha tinan 2010 no Ro kiik rua tan.
Situasaun kona-ba difikuldade kombustivel ne´e la´os de´it Komponente Naval mak infrenta, maibe instituisaun Polísia Nasionál Timor-Leste (PNTL) liu-liu Unidade Polísia Marítima nia Ro 21 labele halo operasaun ba peska ilegal, no Ro hirak ne´e agora para de´it iha Kuartel UPM Sional, Díli.avi
